Алматыда қаладағы алғашқы гастрономиялық көше ашылды

Алматыда қаладағы алғашқы гастрономиялық көше ашылды. Мұнда жаңа мекемелер, жазғы алаңдар, веложол және демалыс орындары пайда болды, деп хабарлайды Tengri Travel Almaty.tv арнасына сілтеме жасап.

Масаншы көшесіндегі ғимараттардың қасбеттері бірыңғай стильге келтіріліп, жарықтандыру жүйесі мен кіреберіс топтары жаңартылды. Ал қоғамдық тамақтану орындарының шоғырлануы көшеге жаңа мәртебе берді.

"Гастрономиялық көшелер – бұл кең таралған халықаралық тәжірибе. Егер коммерциялық алаңдардың кемінде 60 пайызын қоғамдық тамақтану орындары иеленсе, ал қалған нысандар тұрғындар мен келушілерге қолайлы болуы үшін басқа мақсаттарға арналса, солай аталады. Біз алматылықтар мен қала қонақтары абаттандыру нәтижесін көріп, көшенің жаңа тынысын сезінуі үшін Масаншы көшесін ашып отырмыз", – деді Бостандық ауданының әкімі Азамат Қалдыбеков.

Көшенің өзіндік тұжырымдамасы бар – ол жастарға арналған, музыкалық және осы ауданның тарихымен тығыз байланысты. Басты бағыттардың бірі – аңызға айналған "Дос-Мұқасан" ансамблі. Топ мүшелері осы маңда орналасқан Қазақ политехникалық институтының студенттері болған. Ал қалған кеңістік магистраль тұжырымдамасын толықтыратын жобаларға берілді. Олардың арасында гүл дүкендері, шеберханалар, кітап дүкендері және басқа да қалалық алаңдар бар.

"Әрине, біз "Дос-Мұқасан" тобының тарихын ескердік. Мұнда жақын жерде шағын мұражай орналасқан. Музыкаға бағытталған кейбір кіші сәулет нысандары бар. Сондай-ақ жақын арада сүйікті тобымыздың құрметіне арнайы арт-нысан орнатылады. Ғимарат қасбеттері толығымен реконструкциядан өтіп, бірыңғай стильге келтірілді. Әрбір кіреберіс топтың күнқағары, маңдайшасы мен сыртқы ақпараты бір үлгіде жасалды", – деді қалалық даму урбанистика департаментінің директоры Тахмина Сафоева.

Бұл – әзірге пилоттық жоба. Бірақ әкімдік қаланың басқа бөліктерінде де гастрономиялық көшелер ашу мүмкіндігін қарастырып жатыр. Негізгі идея – қалалық кеңістікті біртіндеп өзгерте отырып, шағын және орта бизнесті қолдау және туристер үшін жаңа тартылыс орталықтарын құру.

Бізді Google-дың негізгі дереккөздер тізіміне қосыңыз