Алматыда балаларға арналған алғашқы 15 төсектік паллиативтік бөлімше ашылды

Алматыда №2 қалалық балалар клиникалық ауруханасының базасында ауыр созылмалы және емделмейтін дертке шалдыққан емделушілерге арналған 15 төсектік алғашқы балалар паллиативтік бөлімшесі ашылды, деп хабарлайды Tengri Health Денсаулық сақтау министрлігінің баспасөз қызметіне сілтеме жасап.

Балаларға қандай көмек көрсетіледі?

Стационар ұзақ уақыт медициналық бақылау мен ерекше күтімді қажет ететін балаларға арналған. Мамандар тәулік бойы науқастардың жағдайын бақылап, ауырсынуды және басқа да ауыр симптомдарды басады, сондай-ақ қажет болған жағдайда бейінді дәрігерлерді тартады.

Әр бала үшін оның жағдайына байланысты жеке көмек жоспары әзірленеді.

Министрлік мәліметінше, ата-аналарды қолдау жұмыстың маңызды бөлігіне айналмақ. Мамандар отбасыларға кішкентай науқасқа қалай күтім жасау керектігін түсіндіріп, психологиялық көмек көрсетеді.

"Бұл баланы ауруханадан шыққаннан кейін де сапалы күтіммен қамтамасыз етуге мүмкіндік береді", - деп есептейді Денсаулық сақтау министрлігі.

Денсаулық сақтау министрлігінің мәліметінше, Алматыда паллиативтік мәртебесі белгіленген 300-ге жуық бала бар.

Алматы қоғамдық денсаулық сақтау басқармасының басшысы Марат Пашимов бұл бөлімшенің ашылуы қалада балаларға паллиативтік көмек көрсетудің жеке стационарлық бағытын құру жолындағы алғашқы қадам екенін атап өтті.

"Біздің міндетіміз – ауыр дертке шалдыққан балалардың қажетті медициналық көмекке, ауырсыну мен симптомдарды бақылауға қолжетімділігін қамтамасыз ету, ал ата-аналарға кәсіби қолдау мен сүйемелдеу көрсету", - деді Пашимов.

2024 жылғы 1 шілдедегі жағдай бойынша Қазақстанда балаларға арналған 142 мамандандырылған паллиативтік төсек-орын жұмыс істейді.

Қазақстанға қайтарылған активтер есебінен салынған ауруханалар қандай - шолу

Тағы оқыңыз: Дәрігер кабинетінде тағы бір көмекші пайда болды: жасанды интеллект медицинаны қалай өзгертіп жатыр?

Google News арқылы жаңалықтарымызды қадағалаңыз

Денсаулық

Алматы

Балалар