Астанада 308 үй табиғи газбен қамтылды

Астанада Республика күні қарсаңында «Тельман» тұрғын үй алабына табиғи газ берілді. Нәтижесінде 300-ден астам баспана көгілдір отынмен қамтылып, отбасылар көптен күткен қуанышқа кенелді.

Көгілдір отынға алғаш қосылғандардың бірі Баян Бозғұлова. Оның отбасы 5 жылдан бері көмір тасып, пеш жағып келген. Енді үй жылытып, әуре болмаймын деп қуанып отыр.

Баян Бозғұлова, қала тұрғыны:

Әдетте таңертең тұрған кезде үй қоңыр суық болып тұрады. Бүгін тұрғанда өмір сүруге болады деп қоямын. Жақсы болды. Жылы. Көшіп келгенде түк болған жоқ. Жарық та, жол да болмады. Енді құдайға шүкір бәрі бар.

Көгілдір отынмен қамту жұмыстарын QazaqGaz Aimaq сынды тараптар бірлесе жүзеге асырды. Олар жалпы ұзындығы 22,6 шақырым болатын  газ құбырын тартып, 2 мыңға жуық тұрғынға қуаныш сыйлады.

Уәлихан Қымбатов, «QazaqGaz Aimaq» АҚ Астана өндірістік филиалының директоры:

- Осы жоба Энергетика министрлігі мен қала әкімдігі және QazaqGaz Aimaq бірлесіп, инвестициялық жоба ретінде салынған. Жоба 6 ай ішінде салынды. Жобалауы бар және құрылыс, монтаждау жұмыстары 6 ай ішінде бітті. 

Еділ Жаңбыршин,  ҚР Парламенті Мәжілісінің депутаты:

- Жылдың аяғына дейін Астананың ішіндегі кей шағын аудандар да газдандырылады. Сонда жыл аяғына дейін 500 мыңдай халық көгілдір отынмен қамтамасыз етіледі. Бұл енді өмірдің, халықтың, қоғамның сұранысы, мемлекет басшысының тапсырмасы. Сондықтан бүгінгі іс-шара бәрімізге құтты болсын!

Айта кетейік, елорданы газдандыру 2019 жылдан бері жүзеге асып жатыр. Жақында жоба аясында Астана іргесіндегі Қосшы мен Талапкер елдімекендері де көгілдір отынмен қамтылған еді.

Авторлары: Мерей Қанапия, Ғалымжан Әбдулахат