Астанада әскерилер 102 жасқа толған ардагерді құттықтады

АСТАНА, 19 қазан – Sputnik. 2025 жылғы 18 қазанда Ұлы Отан соғысының ардагері Рзағұл Байкешев 102 жасқа толды, деп хабарлады қорғаныс министрлігі.

Мерейлі жасқа толған ардагерді қорғаныс министрлігінің, Астана қаласының қорғаныс істері жөніндегі департаментінің әскери қызметшілері, "Қарулы күштердің ардагерлері" республикалық қоғамдық бірлестігінің өкілдері мен "Жас сарбаз" әскери-патриоттық қозғалысының тәрбиеленушілері құттықтады.

Рзағұл Байкешевке Қорғаныс министрінің құттықтау хатын, Әлия Молдағұлованың 100 жылдығына арналған мерейтойлық медаль мен естелік сыйлық табыстады.

Ардагерге арналған сый ретінде Қарулы күштердің Ұлттық әскери-патриоттық орталығы Орталық ансамблінің әншілері соғыс жылдарындағы әндер мен Абайдың "Көзімнің қарасы" әнін орындады.

"Рзағұл Байкешев 1923 жылғы 18 қазанда Ақтөбе облысы, Мұғалжар ауданында дүниеге келген. Соғысқа дейін совхозда қарапайым жұмысшы болып еңбек етті. 1943 жылы әскер қатарына шақырылып, Кеңес армиясы құрамында Ржев түбіндегі шайқастарға және Великие Луки қаласы маңындағы шабуылдау операциясына қатысты. Майдан жолы оны Польша, Румыния және Венгрия арқылы алып өткен. Соғысты ефрейтор шенімен аяқтап, елге оралған", - деп жазылған хабарламада.

Соғыстан кейін Рождественка совхозында экспедитор болып еңбек етті. 1983 жылы зейнетке шықты. Екі ұл тәрбиелеп өсірген.

Рзағұл Байкешев I және II дәрежелі Отан соғысы ордендерімен, Жуков медалімен және көптеген мерейтойлық наградалармен марапатталған.