Астанада мас судьяға қатысты қатаң тәртіптік шешім қабылданды

Астана қаласының азаматтық істер жөніндегі ауданаралық сотының судьясы Әсел Досаева мас күйінде көлік басқарғаны үшін қызметінен босатылды, – деп хабарлайды Aikyn.kz сайты.

Жоғары Сот Кеңесі жанындағы Сот жюриі 2026 жылғы 22 қаңтарда қабылдаған шешімінде судьяның әдеп нормаларын өрескел бұзғанын атап өтіп, оған қатысты тәртіптік жаза ретінде қызметінен босату шарасын қолданды.

Соттың кезекті отырысында барлығы 10 судьяға қатысты тәртіптік іс қаралған. Тексеру қорытындысы бойынша алты судья тәртіптік жауапкершілікке тартылды. Олардың төртеуі сот істерін қарау барысында заң талаптарын өрескел бұзғаны үшін жазаланды: үш судьяға ескерту беріліп, бір судьяға сөгіс жарияланды. Тағы екі судья судья әдебінің талаптарын сақтамағаны үшін қызметінен босатылды.

Екі судьяға қатысты тәртіптік іс олардың әрекеттерінде тәртіптік теріс қылық белгілерінің болмауына байланысты тоқтатылды. Ал тағы екі судьяға қатысты материалдарды қарау кейінге қалдырылды.

Еске салайық, 2025 жылғы қараша айының басында әлеуметтік желілерде Астанада азаматтық істер жөніндегі ауданаралық сот судьясының мас күйінде ұсталғаны туралы ақпарат тараған болатын. Кейін бұл деректі Қазақстан Республикасының Ішкі істер министрлігі ресми түрде растады.

2026 жылдың қаңтар айының басында сот Әсел Досаеваны мас күйінде әрі жүргізуші куәлігінсіз көлік басқарғаны үшін кінәлі деп танып, 786 400 теңге көлемінде әкімшілік айыппұл салған. Бұған дейін Астана қаласының мамандандырылған ауданаралық әкімшілік соты да осы дерек бойынша тиісті шешім шығарған еді.