Қақпашы Шерхан Қалмұрзаның болашағына қатысты нақты шешім қабылданды

Алматылық «Қайрат» футбол клубының баспасөз қызметі қақпашы Шерхан Қалмұрзамен жасалған келісімшарттың 2028 жылға дейін ұзартылғанын айтты, – деп хабарлайды Aikyn.kz сайты.

Клуб мәліметінше, жаңа келісім кемінде 2028 жылдың соңына дейін жарамды.

«Шерхан Қалмұрза “Қайрат” клубымен келісімшартын ұзартты. Жаңа келісім 2028 жылғы 30 қарашаға дейін есептелген», – делінген хабарламада.

Айта кетейік, 2025 жылдың соңында «Тараз» футбол клубының директоры Дидар Сыдықбек алматылық «Қайратқа» қақпашы Шерхан Қалмұрзаны трансферлеу жөнінде ұсыныс дайындап жатқанын мәлімдеген еді.

Еске сала кеткен жөн, Шерхан Қалмұрза Алматыда өткен «Қайрат» пен «Реал Мадрид» арасындағы матчтан кейін кеңінен танылды. Аталған ойында негізгі екі қақпашы жарақат алған соң, 18 жастағы Қалмұрза алаңға шығып, команда қақпасын қорғады.

Матчтан кейін Бельгия құрамасының қақпашысы Тибо Куртуа жас қазақстандық қақпашыны әлеуметтік желідегі жазбасында ерекше атап өткен.