Астанада сөндірілмеген сіріңкеден Audi A6 өртеніп кетті

Жоғарғы соттың 2026 жылғы 6 тамызда таратқан ақпаратына сәйкес, оқиға 2025 жылғы мамырда елордадағы автотұрақтардың бірінде болған.

"Жауапкер көлігінде отырып, темекісін тұтатқаннан кейін сөндірілмеген сіріңкені ашық тұрған терезеден сыртқа лақтырған. Сол сәтте жанында тұрған газ-баллон жабдығымен жабдықталған Audi A6 автокөлігі өртеніп кетті", – делінген хабарламада.

Сараптама өрттің талап қоюшының көлігінен газ буының шығуы салдарынан пайда болған газ-ауа қоспасының тұтануынан болғанын анықтады. Ал қоспаның тұтануына жауапкер лақтырған сөндірілмеген сіріңке себеп болған. Келтірілген шығын мөлшері 2,9 млн теңгеден асты.

Сіріңке лақтырған адамға қатысты қылмыстық іс қасақана әрекет болмағандықтан, ал әкімшілік іс ескіру мерзімінің өтуіне байланысты тоқтатылды. Алайда бұл оны азаматтық-құқықтық жауапкершіліктен босатпады.

Сот өртенген көлік иесінің де өрескел абайсыздық танытқанын анықтады.

"Автокөлік газ-баллон жабдығымен жабдықталғанына қарамастан, оны ұзақ уақытқа тұраққа қою алдында өрт қауіпсіздігінің міндетті талаптары сақталмаған. Соның салдарынан газ тараған. Сот қорытындысы бойынша өртке екі жағдай қатар себеп болған: жауапкердің абайсыз әрекеті және талап қоюшының көлікті пайдалану қағидаларын бұзуы", – деп атап өтті Жоғарғы сот.

Сот әр тараптың кінә дәрежесін ескеріп, талап арызды ішінара қанағаттандырды. Жауапкерден талап қоюшының пайдасына материалдық залал мен сот шығындарын өтеу үшін 1,6 млн теңгеден астам қаражат өндірілді.

Сот шешімі заңды күшіне енді.

Бұған дейін Семейде баланың құрғақ шөпті өртеуі салдарынан автокөлік жанып кеткен еді.