Астанадағы мерекелік дрон шоуға қатысты жанжал жалғасын тапты

Астанада Елорда күні қарсаңында өтіп, көптеген көрерменнің көңілін қалдырған дрон-шоу қала әкімдігімен келісілмеген. Әкімдік өкілдерінің сөзінше, ұйымдастырушылар іс-шара туралы міндетті хабарламаны жібермеген. Қазіргі уақытта оның өткізілу мән-жайы, соның ішінде жарнама туралы заңнаманың бұзылу ықтималдығы тексеріліп жатыр, - деп хабарлайды Tengrinews.kz.

Халық мерекелік шоуды күтті

5 шілдеде кешке Атырау көпірінің маңына мыңдаған Астана тұрғыны мен қонақтары жиналды. Әлеуметтік желілерде бұл шара жарқын дрон-шоу ретінде жарияланған: көрермендерге жүздеген дрон, аспандағы жарық бейнелері мен әсерлі көрініс уәде етілді.

Көптеген адам жағалауға бала-шағасымен келіп, көлік кептелісіне тап болды және шоудың басталуын ұзақ күтті. Алайда қойылымның өзі тым қысқа болып шықты, ал бағдарламаның басым бөлігінде логотиптер мен алдағы концерттердің анонстары болған.

Шоудан кейін әлеуметтік желілерде сын толқыны басталды. Көрермендер Елорда күніне арналған мерекелік бағдарлама күткендерін, бірақ оның орнына жарнама көргендерін жазды. Кейбіреулер қысқа ғана қойылым үшін жолға және күтуге бірнеше сағатын жұмсағандарына шағымданды.

Шоу 5 шілдеде кешке - Елорда күні қарсаңында өтті. Күні, өткізілген орны және хабарландырудағы тұжырымдарға байланысты көптеген қала тұрғыны бұл шара ресми мерекелік бағдарламаға кіреді деп ойлаған.

Кейінірек жоба өкілдері бұл шараның коммерциялық сипатта болғанын және Елорда күніне арналмағанын түсіндірді. Олардың айтуынша, шоудың жарнамалық форматын аудиторияның бір бөлігі мен кейбір ақпараттық алаңдар бұрыс түсінген.

Сондай-ақ жарияланған мәлімдемеде іс-шараны өткізу үшін қажетті келісімдер алынғаны айтылған.

Сонымен қатар, 22 шілдеде Астана әкімдігі дрон-шоу өткізу туралы хабарламаның өздеріне түспегенін мәлімдеді.

"Аталған іс-шараны келісу, ұйымдастыру немесе өткізу туралы шешімдер қабылданған жоқ. Астана қаласының әкімдігі мен аталған іс-шараны ұйымдастырушылар арасында шарттар, келісімдер, меморандумдар немесе өзге де құжаттар жасалмаған", - делінген ведомствоның жауабында.

Әкімдік дрон-шоу Елорда күнін мерекелеудің ресми бағдарламасына кірмегенін және қала тарапынан ұйымдастырылмағанын ерекше атап өтті.

Қолданыстағы ережелер бойынша, мәдени-бұқаралық іс-шараны ұйымдастырушы күнтізбелік он күннен кешіктірмей жергілікті атқарушы органға жазбаша хабарлауы тиіс.

Хабарламаға іс-шара бағдарламасын - регламентті немесе сценарийді қоса беру қажет. Әкімдік мәліметінше, бұл жағдайда бекітілген тәртіп сақталмаған.

Әкімшілік ұйымдастырушының іс-әрекетінде мәдени-бұқаралық іс-шара өткізу тәртібін бұзу белгілері болуы мүмкін деп есептейді. Әңгіме Әкімшілік құқық бұзушылық туралы кодекстің 488-1-бабы туралы болып отыр.

Аталған факт бойынша тексеру жүргізіліп жатыр. Сонымен қатар дрон-шоудың мазмұны да зерделеніп жатыр - мамандар онда жосықсыз немесе жасырын жарнама белгілерінің, сондай-ақ жарнама заңнамасын басқа да ықтимал заңбұзушылықтардың бар-жоғын анықтауы тиіс.

"Зерделеу нәтижелері бойынша аталған мән-жайларға тиісті құқықтық баға беріледі", - деп хабарлады әкімдік.

Қорытынды шешім тексеру аяқталғаннан кейін қабылданады.

Google News арқылы жаңалықтарымызды қадағалаңыз