Алдағы “Грэмми“ төңірегіндегі жанжал мен BTS мәлімдемесі жалғасын тапты

Дыбыс жазу академиясы BTS тобының "Грэмми-2027" сыйлығына өз жұмыстарын ұсынбау туралы шешіміне алғаш рет түсініктеме берді. Ұйымның бас директоры кіші Харви Мейсон топтың таңдауын құрметтейтінін айтып, азиялық поп-музыка үшін жаңа номинацияның неліктен енгізілгенін түсіндірді, деп хабарлайды Tengri Life.

Дыбыс жазу академиясы не деп жауап берді?

Billboard өзінің Instagram парақшасында хабарлағандай, Дыбыс жазу академиясының басшысы кіші Харви Мейсон BTS тобы 69-шы "Грэмми" салтанатына қатысудан бас тартатынын жариялағаннан кейін мәлімдеме жасады.

Оның айтуынша, ол музыкант ретінде оңтүстіккореялық ұжымның шешімін түсінеді.

"BTS тобының биылғы "Грэмми" сыйлығына номинациялау процесіне қатыспау туралы шешімін есту маған ауыр тиді, бірақ музыкант ретінде мен олардың бұл таңдауын түсінемін және құрметтеймін", - делінген оның мәлімдемесінде.⁠

"Үздік азиялық поп" номинациясы не үшін пайда болды?

Мейсон жаңа номинация төңірегінде көптеген түсініспеушілік туындағанын атап өтті. Оның айтуынша, жеке санат азиялық орындаушыларды басқа қатысушылардан бөліп тастау үшін емес, Азиядағы поп-музыканың қарқынды өсуі мен әртүрлілігін атап өту үшін құрылған.

"Азиялық поп" санаты Азиядан шығатын поп-музыканың тереңдігін, әртүрлілігін және ерекше өркендеуін көрсету үшін ашылды. Оның мақсаты - осы маңызды әртістердің еңбегін ерекше атап өту. Номинация неғұрлым көп болса, соғұрлым көп орындаушы танылады", - деді бас директор.

Instagram-дағы бұл жазбаны көру

A post shared by billboard (@billboard)

Басты марапаттардан үміткер болуға бола ма?

Академия басшысы жанрлық номинацияларға қатысу әртістердің басты мүсіншелер үшін күресуіне ешқандай шектеу қоймайтынына ерекше назар аударды.

Billboard мәліметінше, "Үздік азиялық поп", "Джаз" немесе "Кантри" сияқты санаттарда мәлімделген музыканттар бұрынғысынша басты марапаттар - "Жыл жазбасы", "Жыл альбомы" және "Жыл әні" номинацияларына ұсыныла алады.

"Жанрлық номинациядағы жетістік пен жалпы номинациялардағы танылу бірін-бірі жоққа шығармайды. Орындаушы екі марапатқа да толықтай үміткер бола алады", - деді ол.

Сондай-ақ ол академияның сыйлықты одан ары халықаралық деңгейге көтеруге, әлемдік музыкалық қауымдастықтың пікірін ескеруге және әртүрлі елдердің әртістеріне қолдау көрсетуге ниетті екенін айтты.

BTS неліктен "Грэммиден" бас тартты?

Күні кеше BTS мүшелері әлеуметтік желіде "Грэмми-2027" сыйлығына жұмыстарын ұсынбайтынын жариялады.

Музыканттар музыка орындау тіліне немесе шыққан еліне қарамастан бағаланатын уақыт келеді деп үміттенетіндерін жеткізді.

Топ өз шешімінің ресми себебін ашып айтпады. Алайда жанкүйерлер бұл бас тартуды сыйлық ережелерінің жақында жаңартылуымен байланыстырады, содан кейін номинациялар арасында жаңа санат - "Азиялық поп-музыканың үздік орындауы" (Best Asian Pop Performance) пайда болды.

Жанкүйерлердің бір бөлігінің пікірінше, жеке номинация азиялық әртістерді негізгі марапаттар үшін күрестен одан сайын алшақтатуы мүмкін. Дыбыс жазу академиясы мұндай түсініктемемен келіспейді және жаңа санат, керісінше, орындаушылардың танылу мүмкіндіктерін кеңейтуі тиіс деп мәлімдейді.

Google News арқылы жаңалықтарымызды қадағалаңыз

Жазылу