Астанадан жыл аяғына дейін 1 200 ден астам жас әскерге жөнелтіледі

Елордада күзгі әскерге шақыру науқаны жүріп жатыр. Қыркүйекте шекара қызметі мен десанттық бөлімдер жасақталған еді. Ал қазір механикаландырылған, арнайы жасақ және барлау бөлімдері, артиллериялық құрамалар толықтырылып жатыр. Осыған орай қалалық шақыру комиссиясының отырысы өтті, деп жазады Egemen.kz.

Фото: ratel.kz

Жиынға запастағы полковник, «Қазақстан Қарулы Күштері ардагерлері» республикалық қоғамдық бірлестігінің өкілі Ғани Артықов пен блогер әрі жаттықтырушы Айтым Жақыпов қатысты. Олар жастарды әскерге жауапкершілікпен қарауға шақырды.

Айтым Жақыповтың айтуынша, әскер – әр жігіт өтуі тиіс өмір мектебі. Ол жастарға бұл кезеңге саналы түрде дайындалу қажеттігін ескертті, әсіресе физикалық дайындықтың маңыздылығына тоқталды.

«Елімізде дайындалуға барлық мүмкіндік бар: фитнес орталықтар, спорт кешендері, клубтар жұмыс істейді. Ең бастысы – шақыру қағазын күтпей, спортпен шұғылдануды ертерек бастау керек. Физикалық форма – жеке денсаулықпен қатар, ел қауіпсіздігіне қосқан үлес. Барлық болашақ сарбаздарға жаттығуға кірісіп, әскерге дайын болуға кеңес беремін. Менің жобама қатысқан жастардың 90%-ы өмірін түбегейлі өзгертті. Көпшілігі марафоншы, жаттықтырушы, тәлімгер атанды. Кейбірі 50-200 келіге дейін салмақ тастады. Бұл тек сыртқы өзгеріс емес, мінездің қалыптасуы. Мұндай адамдар шын мәнінде тәртіпті және физикалық тұрғыдан дайын. Ал бұл әскерге қажетті басты қасиет. Қазіргі бір орында ұзақ отыру өмір салты жас буынның дене белсенділігін төмендетіп, зат алмасуға, жалпы денсаулыққа кері әсерін тигізіп отыр. Армия осының орнын толтырып, негізгі дағдыларды қайта қалыптастыруға мүмкіндік береді. Әскер – бұл абырой үшін емес, Отан алдындағы борыш. Егер сарбаз өзін жақсы қырынан көрсетсе, ол жоғары оқу орнында білімін жалғастырып, кәсіби жолын Қорғаныс министрлігімен бірге жоспарлай алады. Бұл – әлеуметтік лифт», дейді ол.

Ал Ғани Артықовтың айтуынша, қазір елордада шақыру науқанының белсенді кезеңі өтіп жатыр. Ол үшін азаматтар алдымен медициналық комиссиядан өтеді. Онда олардың денсаулығы жіті тексеріледі. Тек толық жарамды деп танылғандар ғана әскер түрлеріне жіберіледі.

«Мәселен, десанттық-шабуыл және арнайы бөлімдерге бойы 170 см-ден жоғары, денсаулығы мен спорттық дайындығы мықты жігіттер іріктеледі. Жақсы жүзетіндер – Әскери-теңіз күштеріне қабылданады. Жоғары білімі бар математиктер мен IT-мамандар әуе шабуылына қарсы қорғаныс бөлімдерінде жұмыс істеп, зениттік жүйелер мен радарларды басқарады. Бағдарламашылар мен инженерлер ғылыми бөлімшелерге бөлініп, бағдарламалық қамтамасыз ету мен ақпараттық жүйелерді дамытады. Заң факультеттерінің түлектері көбіне Ұлттық ұлан қатарына қабылданады, себебі бұл құрылым құқық қорғау саласына кадр дайындайтын негізгі база саналады», дейді «Қазақстан Қарулы Күштері ардагерлері» республикалық қоғамдық бірлестігінің өкілі.

Айта кетейік қарашаның аяғына дейін Ұлттық ұлан мен ТЖМ құтқару бөлімдеріне әскерге алу жалғасады. Бұл құрылымдарға үміткерлерге қойылатын талаптар да жоғары – дене дайындығы мен кәсіби қабілеті қатаң бағаланады. Жалпы, биыл елордадан 1 200-ден астам жас сарбаз әскерге жөнелтіледі.