Астаналық оқушылар прокуратура қызметімен танысты

Астана қаласының прокуратурасы оқушыларға Ашық есік күнін ұйымдастырып, қадағалаушы органның жұмысымен таныстырды.

Балаларға құқықтық мәдениетті сақтап, тәртіпті болу насихатталды. Ғимаратты аралау барысында заңсыз әрекеттер камера көмегімен қалай анықталатыны көрсетілді. Сондай-ақ кәмелетке толмағандар жиі жасайтын заңбұзушылықтар айтылып, оның жазасы туралы ақпарат берілді. 

Бұл оқушылар бүгін өміріндегі ең маңызды сабақтың біріне қатысты. Қалалық прокуратура ғимараты білім ордасына айналды. Ал дәрісті мұғалім емес, кәнігі кәсіби прокурорлар өткізді. Қадағалаушы орган өкілдері өз қызметін көрсетіп, кейін заңға бағынбаудың салдарын баяндады.

Жасұлан Сарпеков, Астана қаласы прокурорының аға көмекшісі:

- Бұл шараның басты мақсаты - балаларға прокуратура органдарының жалпы қызметі туралы айту, түсіндіру. Сондай-ақ Заң мен тәртіптің мағынасын түсіндіру, өсіп келе жатқан жасөспірімдерге қоғамда өзін қалай ұстау, заң бұзбауға үйрету болып табылады. Әкімшілік, қылмыстық жауапкершіліктің қандай түрлері көзделген? Соның бәрі көрсетілетін болады.

Алдымен оқушылар ғимараттағы музейге барып, прокуратура тарихымен танысты. Кейін ішкі құрылымын көріп, ситуациялық орталыққа барды. Мұнда 10 000-нан астам бейнебақылау камерасы қосылған. Осылайша, қаланы толық бақылауға болады. Демек, кез келген заңбұзушы жауапкершіліктен қашып құтылмайды. Мұны балалар да жақсы түсінеді.

Ақниет Таңатар, №26 мектеп-гимназиясының оқушысы:

- Тәртіпке бағынған құл болмайды. Әрқашан заңды бұзбау керек. Бұл жерге бірінші рет келіп тұрмын. Маған ұнады.

Жастар арасында буллинг, бұзақылық сынды заңсыз әрекеттер жиі болады. Ал мұндай түсіндірме жұмыстары олқылықтың алдын алуға жақсы көмектеседі дейді мамандар. Сол үшін балалармен кездесу жиі әрі үздіксіз ұйымдастырылады.

Ғалы Бексұлтанов, Астана қаласы прокурорының аға көмекшісі - топ жетекшісі:

- Аптасына бір рет мектептерге барып оқу өткіземіз. Жасөспірімдермен, оқушылармен кездесу жүргіземіз. Біздің жобаларымыз Заң мен тәртіп жобасында заңдылықты жеткіземіз, тәртіпті бұзбауды жеткіземіз. Буллинг болмауы үшін, әр адамның құқығын бұзбау үшін мектепте сондай жұмыс жасалып жатады.

Балаларға азаматтарды қабылдау орталығы мен құрылымдық бөлімшелердің қызметі де көрсетілді. Цифрлық жобалар таныстырылды. Есірткі, буллинг, алаяқтық сынды құқық бұзушылықтардың салдары айтылды. Іс-шара соңында балалар прокурорлармен еркін әңгімелесіп, сұрақтарын қойды.

Авторлары: Бекзат Аманов, Мерей Талап