Ата анасы ұлының арманын орындап, қазақстандықтардың жүрегін елжіретті

Кішкентай Темір көптен бері өз велосипеді болғанын армандаған. Ата-анасы ұлының арманын ерекше тәсілмен орындауды ұйғарды: олар жаңа велосипедті үйге барар жолда қалдырып кеткен, ал балақай көптен күткен сыйлығын кездейсоқ тауып алады. Оның шынайы реакциясы желі қолданушыларын тәнті етті, деп хабарлайды Tengri Life.

Ең көптен күткен сыйлық

Ата-анасы Темірге тосынсый дайындап, жаңа велосипедті оның күнделікті үйге қайтар жолында қалдырған, бірақ сыйлықтың оған арналғанын айтпаған.

Велосипедті көрген бала алғашында оған сүйсіне қарап, бірақ екі дөңгелекті көлікке жақындауға батпады. Темір оны біреудің заты деп ойлап, ұстаудан бас тартты. Көндіргеннен кейін ғана велосипедке аз уақыт отырды, содан соң отбасы басты құпияны ашты - көптен күткен сыйлық оған арналған болып шықты. Мұны түсінген бала қуанышын жасыра алмай, бірден ата-анасына алғыс айтты.

Баланың анасы Анастасия Сүлейменова Темірдің шынайы эмоциясын видеоға түсіріп алған, бұл бейнеролик әлеуметтік желіде тез танымал болды.

Баланың шынайы таңданысы мен ақжарқын қуанышы желі қолданушыларының жүрегін бірден жаулап алды. Көпшілік дәл осындай қарапайым әрі жылы сәттер балалық шақты нағыз бақытты ететінін айтады.

Instagram-дағы бұл жарияланымды көру

Tengri LIVE (@tengri.live) жарияланымы

Пікір қалдырушылар Темірдің тәрбиесіне тәнті болып, баланың рұқсатсыз, өзгенің мүлкі деп санаған велосипедті алмағанына назар аударды.

Көпшілік ата-анасын ұлының бойына өзгенің мүлкіне деген құрметті сіңіргені үшін мақтады, дегенмен кейбіреулер мұндай жағдайда балаларға біреудің затын мүлдем ұстамау керектігін түсіндіру маңызды екенін атап өтті.

Әзіл де тыс қалмады - кейбір қолданушылар жақын жерде жасырынып тұрған Темірдің әкесін ірі дене бітіміне байланысты Таноспен салыстырды.

Темірдің әкесі Талғат Сүлейменовтің айтуынша, бұл кадрлардың артында жантүршігерлік жол апатынан кейінгі бес жылдық оңалу тарихы тұр. Осыдан бес жыл бұрын отбасы жол апатына ұшырап, салдарынан отбасының бес мүшесінің үшеуі мүгедектік алған.

"Көлікте мен, әйелім және үш балам болды. Ол кезде үлкен қызым Сафия көптеген сынық алды. Ортаншы ұлым Самир күрделі жарақаттар алды. Бірақ ол аман қалды. Сол кезде жаңа ғана бір жасқа толған Темірдің маңдай сүйегі сынып, көптеген жарақат пен соққы алған еді. Бүгінде олардың әрбір басқан қадамы, әрбір жаңа қозғалысы, әрбір айтылған сөзі - күнделікті күрестің, оңалтудың және орасан зор ерік-жігердің нәтижесі", - деп бөлісті отағасы.

Instagram-дағы бұл жарияланымды көру

Talgat Suleimenov (@talgat_suleimenov) жарияланымы

Әкесінің өзі де ауыр жарақат алып, кейін оған мүгедектік тағайындалған. Алайда отбасы өткенмен өмір сүрмеуге шешім қабылдады. Қазір олар жаттығу жасап, спортпен шұғылданады, бала тәрбиелеп, оңалтудың жаңа әдістерін іздеп жүр.

"Мен адамдар өлерінде екі нәрсеге өкінетінін түсіндім. Олар - саяхат және отбасымен өткізген уақыт. Мен өмірімнің барынша көп бөлігін отбасыма және балаларыма арнаймын деп шештім. Біздің оқиғамыз аяныш туралы емес. Ол ең ауыр сынақтан кейін де өмір сүруге, сүюге, күресуге және үмітті үзбеуге болатыны туралы", - деді Талғат.

Қазір ерлі-зайыпты ұқсас жағдайға тап болған басқа отбасыларға көмектесу үшін Қазақстанда заманауи спорт-оңалту орталығын ашуды армандайды.

Instagram-дағы бұл жарияланымды көру

Talgat Suleimenov (@talgat_suleimenov) жарияланымы

Баланың әкесінің айтуынша, велосипедті дәл осындай ерекше тәсілмен сыйлау идеясы кездейсоқ туындаған.

"Мен велосипедті сатып алып, көліктің жүк салғышына салдым да, жұмыс бабымен жүрдім. Бұл уақытта Темір анасымен бірге оңалтудан кейін үйге жаяу қайтып бара жатқан. Мен саябақ маңынан өтіп бара жатып, жұбайыма велосипедті жол бойына қойып, өзім жасырынатынымды айттым. Ол: "О, керемет, солай істейік", деді. Болды. Біз ештеңе жоспарламадық, сценарий жазбадық, бәрі өздігінен болды", - деді отағасы.

Оның айтуынша, видео жарияланғаннан кейін Темірді көшеде тани бастаған. Баланың кенет танымал болуы қуантады - ол осы оқиғадан кейін туындаған назарды ықыласпен қабылдайды.

Тағы оқыңыз: "Бәрі бір сұрақ қояды": келбеті ерекше екі жасар қазақ қызы желіні тамсандырды

Google News арқылы жаңалықтарымызды қадағалаңыз