Атажұртқа атпен сапар шеккен қандастар Астанаға жетті

Олар Тарбағатай аймағына қарасты Сауан ауданынан 8 тамыз күні жолға шыққан болатын. 74 күнін ат үстінде өткізген жолаушылар қазақтың ұлан-ғайыр даласын ат тұяғымен дүбірлетіп, Сарыарқаға жетті. Сапардың жалпы аралығы — 2 500 шақырымнан асады.

— Ойға алған үлкен арманымыз орындалды. Ерекше қуаныштымын! Әсерімді айтып жеткізе алмаймын. Бұл сапар — өмірімізде өшпестей орын алған ерекше естелік болып қалады, — дейді Қуанбек Түсіпханұлы.

Саяхатшылар ат жалындағы алыс сапардың қиындығын жол бойындағы ыстық ықыласпен қарсы алып, көмек көрсеткен ақпейіл жандардың ізгі ниеті ұмыттырып жібергенін айтады.

— Шекарадан өткелі жолдағы елдің ыстық ықыласы, пейілі, мейірі бізге тілекші болып, барын беріп, жоғымызды толықтап, жүгіріп жүрген ізгі ниеті бізді ерекше тебірентті. Тіпті орыс, түрік секілді өзге ұлт өкілдері де бізді естіп, алыстан іздеп келіп, азық-түлік беріп, көмектесіп жатыр. Жол бойы тілеулес болып, қолдау көрсеткен барша ағайынға алғысымыз шексіз. Бұл — бір отбасының емес, тұтас ұлтымыздың сапары болғандай. Сапардан алған әсеріміз өте керемет: әсем табиғат, қонақжай ел, жолдағы көрікті жерлерді көріп, білгенімізді түсіріп, әлеуметтік желіге жариялап отырдық. Артта қалған алыстағы ағайын да хабарласып, елдің ықыласына риза болып сәлем жолдап жатыр, — дейді жұбайлар.

Күтіп алу шарасы аясында Дүниежүзі қазақтары қауымдастығының өкілдері жолаушыларды арнайы төсбелгімен марапаттап, алғыс хат табыс етті.

Алыс жолды атпен бағындырып, Астанаға жеткен қандастарымызды күтіп алуға келген Мәжіліс депутаты Ерлан Саиров жастардың ісі елді береке-бірлікке шақырғанын атап өтті.

— Бүгін қазақ әлемі үшін өте айтулы күн деп айтуға болады. Өйткені сонау арғы беттен Қуанбек пен Жайна қарындасымыз қазақтың қарашаңырағына ат терлетіп, елімізге деген сағынышын алып келіп отыр. Бізді бір қуантатыны — ат үстіндегі жұбайлар қазақ еліне кіргеннен бастап халқымыз бұл азаматтарға шын ықыласын, ізгі ниетін көрсетті. Бұл — ұлтымыздың ынтымағы мен бірлігінің жоғары деңгейде екенін көрсетеді. Сондықтан бұл ұзақ сапарды қазақ халқының ынтымағы мен достығының сапары болды деп айтуға толық негіз бар. Осындай игі шараны қолға алған жолаушы жұбайларға үлкен алғыс білдіреміз. Астанаға келген қадамдарыңыз құтты болсын! Әлемнің әр түкпіріндегі қандастарымыз қазақ еліне жинала берсін, — деді Ерлан Саиров.

Бұл Қуанбек пен Жайнаның алғашқы алыс сапары емес. Қол ұстасқан қос ғашық 2021 жылы Шыңжаңнан жолға шығып, 4 000 шақырымдай жолды атпен жүріп өтіп, Бейжіңге барған екен.

Айта кетейік, бұған дейін сайтымызда саяхатшылардың ұзақ сапары туралы мақала жарық көрген еді.