Атырау әкімдігінде балалар алаңы туралы журналистік сауал азаматтың өтінішіне айналды

Қалалық тұрғын үй-коммуналдық шаруашылық бөлімі редакцияның ресми журналистік сауалына нақты жауап берудің орнына, оны жеке тұлғаның өтініші ретінде рәсімдеп, Әкімшілік рәсімдік-процестік кодекс нормаларына сілтеме жасаған.

«АЖ» тілшісі Сырым Датұлы көшесі, 13 мекенжайындағы балалар алаңының жағдайы және қаладағы ойын алаңдарына қатысты жалпы ахуал бойынша ресми сауал жолдаған еді.

Тұрғындардың айтуынша, алаңдағы ойын жабдықтары жаңартылғанымен, қауіпсіз жабын — газон немесе резеңке төсем орнатылмаған. Редакцияда нысанның жағдайын дәлелдейтін фотоматериалдар бар. Қала тұрғындарының айтуынша, мұндай жағдайлар Атырауда жиі кездеседі.

Редакцияның сауалына жауап ретінде ТКШ бөлімінен жеке тұлғаның өтінішін қарау түрінде рәсімделген хат жолданды. Алайда редакция нақтылап отыр: жолданғаны —  жеке азаматтың өтініші емес, бұқаралық ақпарат құралдарының журналистік сауалы.

Қазақстан Республикасының «Масс-медиа туралы» заңына сәйкес, мемлекеттік органдар редакциялар мен журналистерге сұралған ақпаратты беруге міндетті, тек заңда нақты көзделген жағдайларда ғана бас тартуға құқылы. Осыған байланысты редакция бөлімге қайтадан жүгініп, бұрын жолданған сұрақтар бойынша ақпарат беруді талап етті.

Қайта жолданған сауалда редакция аталған алаңдағы жұмыстарға да, жалпы қаладағы жағдайға да қатысты нақты сұрақтарды тұжырымдап қойды:

Аталған балалар алаңындағы жұмыстар қай жоба аясында жүргізілді? Бұл нысан бойынша мердігер ұйым қайсы? Орындалған жұмыстардың жалпы құны қандай? Қауіпсіз жабын (резеңке, газон немесе басқа түрі) қарастырылған ба? Осы учаскедегі жұмыстарды жалғастыру жоспарланған ба, егер жоспарланса, олардың аяқталу мерзімі қандай? Жоба бойынша қандай қосымша элементтер (жарықтандыру, қоршау, шағын сәулеттік формалар және т.б.) қарастырылған?

Редакция қала бойынша жалпы ақпарат сұрады:

2026 жылы қанша балалар алаңы жөнделеді немесе салынады?Бұл мақсатқа бюджеттен қандай жалпы қаржы көлемі қарастырылған?Аталған жобалар бойынша мердігер ұйымдар қайсы?

Айта кетейік, қала әкімі Шакир Кейкінге педофилия ісі бойынша сотталған әрі кейін өлтірілген адаммен туыстық байланысы мен шараға қатысуы туралы басқа журналистік сауалдан кейін, әкімдікте журналистерден қызметтік куәлікті талап ете бастады. Бұған дейін әкімдікке және басқа мемлекеттік органдарға жүгінгенде мұндай талап қойылмай, жауаптар қосымша шартсыз берілетін.

Бұл жай ғана сәйкестік пе, әкімдікте түсіндірілген жоқ.

Айнұр САПАРОВА

С. Датұлы көшесі, 13 үй тұрғындары жолдаған суреттер

Бүгін, 11:41