Атырау экс әкімдерінің балалары немен айналысады. 1 бөлім

Қазақстандық журналист Дмитрий Шишкин Атырау облысының бұрынғы әкімдерінің балалары мен олардың кәсібі мен активтеріне арналған материалдар сериясын жариялады.

Сағат Түгелбаев (1992–1994) 

Бұрынғы әкім Сағат Түгелбаев өңірді 1992–1994 жылдары басқарған. Бүгінде ол мұнай-газ саласында бизнес жүргізіп отыр. Іскер басылымдардың дерегіне сүйенсек, оның байлығы ондаған миллион доллар деп бағаланады. Негізгі активі – «Anaco» мұнай өндіруші компаниясы. Үлкен ұлы Олжас Түгелбаев 2013 жылы автокөлік апатынан қаза тапқан. Қызы Әлия Швейцарияда тұрады, ол банк саласында жұмыс істеген және бизнеспен айналысады. Кіші ұлы Талғат халықаралық құрылымдармен байланысты. LinkedIn парақшасында оның Люцерн қаласындағы First Montana Capital AG компаниясында жұмыс істейтіні көрсетілген. Бұл швейцариялық фирма «Anaco» ЖШС мен «Атыраунефтемаш» зауытының бас компаниясы болып табылады, олар да Түгелбаевтың бизнес-империясына кіреді.

Равиль Шырдабаев (1994–1999) 

Журналист дерегіне сәйкес, Равиль Шырдабаевтың ұлдары Бауыржан мен Сәбит мұнай-газ саласында жұмыс істеген, халықаралық және қазақстандық компанияларда түрлі қызмет атқарған, бірақ жеке бизнес активтері жоқ. Қызы Жанна кәсіпкерлікпен айналысады. Ол көтерме сауда саласында жұмыс істейтін екі компанияға иелік етеді. Бұл компаниялар мемлекеттік сатып алуларға қатысқан, алайда ашық деректерде екеуі де жосықсыз қатысушылар ретінде тіркелген.

Серікбек Дәукеев (2000–2002) 

Келесі материалда өңірді 2000–2002 жылдары басқарған Серікбек Дәукеевтің отбасы қарастырылған. Журналист дерегіне сәйкес, оның ұлы Данияр Дәукеев 20 жылдан астам уақыт бойы ұлттық спорт түрлерін және дәстүрлерді дамытуға атсалысып келеді. Ол Алматыда «Daukey Kokpar» клубын құрған, онда көкпар бойынша жаттығулар мен жарыстар өткізіледі. Сонымен қатар ол жастар лигасы – «Jastar Kokpar Ligasy»-ды басқарады. Ашық деректерге сүйенсек, «Дәукей Көкпар Клуб» ЖШС 2022 жылы тіркелген, бірақ әзірге салық төлемеген. Ал көкпарды дамытуға байланысты қоғамдық бірлестік 2023 жылдан бері бюджетке шамамен 200 мың теңге аударған. Ұйым құрылтайшыларының арасында Данияр Дәукеевтің туыстары бар. Сонымен қатар ол мал шаруашылығы саласында жеке кәсіпкерлікке ие және қоғамдық қорлардың жұмысына қатысады. Материалда экс-әкімнің жиен інісі – Тимур Дәукеев те аталады. Ол Ғұмарбек Дәукеевтің ұлы, Алматы энергетика және байланыс университетінің бұрынғы ректоры. Ашық деректерге сәйкес, Тимур ғылыми қызметпен айналысады және техникалық саладағы патент авторларының бірі. Патент базасында «Қазандықтарды консервациялау тәсілі» атты өнертабыс бар, онда ол авторлардың қатарында көрсетілген.

Бұл жарияланымдар циклы өңірдің бұрынғы басшыларының балаларының мансаптары мен активтерін ашық деректер мен ресми реестрлер негізінде талдауға арналған.

Бүгін, 22:40