Атырау футбол клубы сатылымға шығарылды

Клубтың 100 пайыз үлесі үшін бастапқы баға – 175,6 млн теңге, нарықтық құны – 250,8 млн теңге. Сауда 10 наурызда өтеді, жалғыз қатысушыға сату мүмкіндігі бар.

Жаңа қожайын клубты жай ғана сатып алып қоймай, бекітілген 27 тармақтан тұратын қатаң талаптарды орындауға міндеттеледі. 

Инвесторға жүктелетін негізгі міндеттер төмендегідей:

– Футбол академиясын салу: Инвестор өз қаражаты есебінен құны 1 миллиард теңгеден кем болмайтын заманауи футбол академиясын тұрғызуы тиіс.

– Инфрақұрылымды сақтау: 8 660 көрерменге арналған «Мұнайшы» стадионын тиісті деңгейде иелік ету және күтіп баптау.

– Әлеуметтік жауапкершілік: Алдағы 3 жыл ішінде футбол орталығында кемінде 1 000 баланы тегін оқыту. Сондай-ақ клубтың негізгі құрамына жергілікті тәрбиеленушілерді жүйелі түрде тарту.

– Қаржылық ашықтық: Жыл сайын кіріс-шығыс бойынша аудиторлық тексерістен өтіп, мемлекеттік органдарға егжей-тегжейлі есеп беру.

– Брендті сақтау: Клубтың тарихи атауын, түстерін және эмблемасын құзырлы органдардың келісімінсіз өзгертуге қатаң тыйым салынады.

Бұл қадам клубты тек бизнес нысаны ретінде емес, аймақтық футболдың даму орталығы ретінде сақтап қалуды көздейді.

Еске сала кетейік, осыған дейін «Ордабасы» футбол клубы жеке басқаруға өткен командалар қатарына қосылатынын хабарлағанбыз.