Атырау облысы Доссор кентінде ескі үйлер жөнделіп жатыр

Доссор кентінде ескі үйлер жөнделе бастады.

Биыл 2 қабатты 28 тұрғын үйдің шатыры ауыстырылып, қас беттері жаңғыртылды.

Жалпы өңірде ең көне үй қоры осы Доссор кентінде. Мұнда 1911-1950 жылдары салынған нысандарда 530-ға тарта отбасы тұрып жатыр. Осыған орай жыл басында облыста кешенді бағдарлама жасалып, үйлерді жөндеуге 2 млрд теңге бөлінген. Қазір қаражат толық игерілді. Келер жылы тағы 35 көп қабатты үй жөнделеді.

Қазақ мұнай өнеркәсібінің қара шаңырағы саналатын Доссор кентінде 140-тан астам үйдің алды өткен ғасырдың басында, соңы 70 жылдан бері жаңартылмай келді. Биыл екі қабатты 28 үйге құрылыс жұмыстары жүргізілді. Шатырлары ауыстырылды, қас беттері әрленіп, есік-терзелері жаңартылған. Алайда Доссорда тозығы жеткен ғимарат көп. Оларда әлі күнге дейін жан төзгісіз жағдайда адамдар тұрып жатыр.

Алмара Айтқалиқызы, Доссор кентінің тұрғыны:

- Ал енді сол жерлерде сонау мұнайды бастап өндіруге келген ағылшындардың салған ағаш үйлері бар. Олар бірнеше үйлерден тұратын барақ типті домдар деп аталады. Олар әбден ескірген. Бірақ онда әлі де адамдар тұрады. Олар біз көріп жатқан игіліктерді көп көріп отырған жоқ. Не кәріз жүйелері жоқ оларда, суды әлі де даладан тасып ішеді.

Арыстанбек Кенже, тілші:

- Доссор кентіндегі ең көне ғимарат саналатын мына үй 1911 жылы пайдалануға берілген екен. Сол кезде осы кәсіпшілік басшылары ағайынды Нобельдер тұрған дегенді айтады. Болашақта бұл үй мұражайға айналуы әбден мүмкін. 

Облыс аудандары ішінде тұрғын үй қоры тозған осы Доссор кенті. Оларды жаңартуға биыл облыстық бюджеттен 2 млрд теңге қаралып, жұмыс басталды. Келер жылы тағы 35 екі қабатты үйді жаңартуға қаражат бөлінеді деп күтілуде. Сондай-ақ апатты деп танылған көне ғимараттар да бар. 

Бекәділ Жайкин, Мақат ауданы әкімінің орынбасары:

- 107 барак үй бар оның ішінде 528 пәтер бар. Сонымен қатар өздеріңіз көріп тұрғандай 2 қатарлы үйлер де бар. 1949-50 жылдары салынған үйлер. Тозығы жетіп тұрған үйлер. Олардағы тұрғындарды баспанамен қамту мақсатында жер телімін мемлекет қажетіне алу жөнінде құжаттар рәсімдеп жатырмыз. 

Жыл аяғына дейін Мақат ауданында 2 пәтерлік 80 жаңа үй пайдалануға берілмек. Оған баспаналары апатты жағдайда деп танылған және көпбалалы отбасылар көшеді. Келер жылы тағы 100 пәтер пайдалануға берілсе, аудандағы, соның ішінде Доссор кентінің тұрғын үй қоры жаңарары сөзсіз. Жалпы облыс аудандарында тозығы жеткен 8 мыңдай ескі үй бар. Оларды жөндеу жұмыстары кезең-кезеңімен осылай жүзеге асырылмақ.

Арыстанбек Кенже, Айбек Байзақов, Жандос Рахметуллин