Атырау облысында өзен мен канал түбі тереңдетіліп жатыр

Атырау облысында Жем өзені мен Құрсай каналының түбі тереңдетіліп, арнасы кеңейтіліп жатыр. Былтырғы тасқында су арнасынан асып,  Құлсарыны басып қалған еді. Тұрғындар шығынға батып, біраз әбігер болды. 

Бастауын Мұғалжар тауларынан алатын Жем өзені қазір баяу ағып жатыр. Дегенмен,  көктемде қар суы қосылғанда, таситыны бар. Былтырғы тасқын тұрғындарды орасан шығынға батырды. Кейін жауаптылар өзен түбін тереңдетіп, арнасын кеңейтуді бастады. Қазір жоғарыдан келетін суды реттеуға арналған 2 гидрошлюздің құрылысы жүріп жатыр.

Асланбек Шығыр, тілші:

- Қазір Жем өзенінің бойында 2 шлюз орнатылып жатыр. Ұзындығы 125 метр. Бірі Құрсай каналы арқылы Құлсары қаласына су жіберсе, екіншісі Жем өзеніне келген суды реттеп отырады. Қазір бетон құю жұмыстары қарқынды жүріп жатыр.

Гидрошлюздің құрылысы жыл соңына дейін аяқталады,- дейді мердігер мекеме өкілі. Қазір 10 шақты техника мен 30-дан аса адам жұмыс істеп жатыр. Жалпы Жем өзенінің жоба бойынша бекітілген 50 шақырымы тереңдетілді.

Жасұлан Самалиев, құрылыс-монтаж прорабы:

- Жем арнасының түбін тереңдетіп және соның артық топырақтарын шығарып жатырмыз. Қазір дайындық жұмыстары. Болашақта мынау жердегі бүкіл бетон құю жұмыстары біткеннен кейін топырақтарды алып, сайларды толтырып, тығыздап, нығыздап, желтоқсан айына өткіземіз деп ойлаймын.

Құлсарының ортасынан өтетін Құрсай каналы да тазартылып, табаны қазылып жатыр. Бірінші кезең бойынша жұмыстар толық аяқталғаннан кейін жағаны бетондау жұмыстары жүргізіледі. Кейін айналасы абаттандырылып, тұрғындарға қолайлы жағдай жасалмақ.

Cабыржан Орманов, мердігер мекеме өкілі:

- Тазарту жұмыстары жүргізіліп жатыр. 5 амфибия (трактор) болды. 22 арнайы техникамен жұмыс атқарылып жатыр. Қазіргі таңда қалдықтарды шығарып жатырмыз. Келесі жылы бетон құю жұмыстары жүргізіледі. Жемнің арнасында Тұрғызба жақта тармақ бар. Сол жерде су тіреліп қалады, ол жағын да кеңейтіп, ашамыз. Су Каспийға жетіп қала ма деген ойымыз бар.

Жоба бойынша Жем өзеніндегі су деңгейін бақылауға арналған 3 гидробекет салынады. Облыстық құрылыс басқармасының мәліметінше, жалпы жоба құны 40 млрд теңгеден асады. Жем өзені мен Құрсай каналынан бөлек, Жайық және Қиғаш өзендері де тереңдетілуде.

 Ернар Қадырбай, облыстық Құрылыс басқармасының бас маманы:

- Бүгінгі күні Жайық өзенінің арнасын тереңдету жұмыстары толықтай аяқталды. Оған кіретін жұмыстардың ішінде Приморский каналы, 6-канал және Зарослый каналдары, үшінші өзекте түп тереңдету жұмыстары қарастырылған. Бұл жұмыстар қазіргі таңда толықтай жасалып, аяқталып тұр. Сонымен қатар Құрманғазы ауданында орналасқан Қиғаш өзенінің арналарын кеңейту жұмыстары қазіргі таңда өз жалғасын табуда.

Өзен түбін тереңдету судың теңізге кедергісіз жетуіне мүмкіндік береді. Сондай-ақ балықшылардың да мәселесі шешілмек. Бұған дейін қайықтары қайраңда қалған олар өзен арнасы тереңдетілсе, теңізге алаңсыз өте алады.

Авторлары: Асланбек Шығыр, Айбек Байзақов, Амантай Матенов