Атырауда өзендердің түбі тереңдетіліп жатыр

Атырауда Ноғайты өзенінің жағасы бекітіліп, түбі тереңдетіліп жатыр. Құрылыс жұмыстары қаңтар айында аяқталуы тиіс.

Қазір 40-қа тарта жұмысшы мен 25 техника күні-түні тынымсыз жұмыс істеуде. Одан бөлек Ойыл өзенінің де табаны қазылып жатыр.

Қызылқоға ауданындағы Сағыз ауылының ортасымен өтетін Ноғайты өзені көктемгі тасқын кезінде тұрғын үйлерге қауіп төндіретін. Бұрын-соңды тереңдетілмеген өзен арнасы әбден тайызданған. Былтырғы тасқыннан кейін жауаптылар арнаның табанын қазып, жағасын бекітуді қолға алды.

Ноғайты өзенінің арнасы 20 метрден бастап, 50 метрге дейін кеңейтілуде. Ал табаны 1 метр 70 см-ден тайыз жерде 2,5 метрге дейін тереңдетіліп жатыр. Мердігер мекеме өкілдерінің айтуынша, қазір жұмыстардың 90 пайызы аяқталған.

Өзен арнасының 4,7 шақырымы тереңдетіліп, жағасы арнайы технологиямен бекітілуде. Жағаға геоторлар қойылып, кейін Мұғалжар тауының тасымен толтырылады. Жоба құны 3 млрд теңгеден асады.

Владислав Жеребненко, мердігер мекеме өкілі:

- Ноғайты – жаз айларында құрғап қалатын өзен. Бірақ биыл Ақтөбеден су үздіксіз келді. Өзен арнасы құрғаған жоқ. Десе де мұндай қиындықтарға қарамастан жұмысты жүргізіп жатырмыз. Сәуірде басталған құрылыс жұмыстарын алдағы қаңтар айында аяқтауды жоспарлап отырмыз.

Ноғайтыдан бөлек аудан үшін маңызы зор Ойыл өзенінің де түбі тереңдетіліп, жағасы бекітіліп жатыр. Өзен көктемгі тасқын кезінде 8 ауылға қауіп төндіреді. Былтыр да арнасынан асып, кей ауылдармен жол қатынасы үзілген еді. Енді құны 10 млрд теңгені құрайтын жоба қолға алынды.

Қанат Әзмұханов, Қызылқоға ауданының әкімі:

- Ойыл арнасын тазалап алу, жалпы біздің тұрғындардың үлкен армандарының бірі деп айтуға болады. Себебі Ойыл арнасына келетін су, ол тұрғындарға да, малға да өте қолайлы жағдай туғызады. Жалпы ауданымызда Ойыл өзені 176 километрде орналасқан болса, соның 80 километрін зерттеп  дамбыларын бекіту жұмыстарын жүргізіп жатырмыз.

Ойыл өзеніне келген суды реттеп отыратын «Ералы» су торабы да жаңғыртылып жатыр. Осылайша, ауылдарға төнетін қауіп сейілмек. Жалпы өңірде өзендердің түбін тереңдету жұмыстары қарқынды. Жылыой ауданындағы Жем өзені мен Құрсай каналының да табаны қазылып, арнасы кеңейтілуде.

Авторлары: Асланбек Шығыр, Амантай Матенов, Жандос Рахметуллин