Атырауда ақылды бағдаршамдар орнатылып жатыр

Атырауда жол қозғалысын жасанды интеллект реттейді, деп хабарлайды 24KZ. Цифрлық жүйеге негізделген ақылды бағдаршамдар қаладағы 80-ге жуық қиылысқа қойылады. Құрылғылар заманауи технологиялар мен жасанды интеллект мүмкіндіктерін пайдалана отырып, көлік ағынын тиімді реттей алады.

Енді жүргізушілер кептелісте көп уақыт жоғалтпайды. «Ақылды» бағдаршамдарда орналасқан мына камералар көлік ағынын жасанды интеллект көмегімен есептеп, қызыл-жасыл түсті өзі жағады.

Тілепберген Ақболатов, ПД аға инспекторы:

- Көлік құралдарының қарқындылығын тиімді реттейді. Яғни қай бағытта көлік құралдары көп жүреді, сол бағытқа қарай көлік құралының қарқындылығын санай отырып, жасыл неғұрлым сол жаққа көп жанады және жаяу жүргіншілердің өтіп бара жатқан кездерде оны да есепке бірге ала отырады.

Жүргізушілер ғана емес, жүргіншілер де жасанды интеллектінің игілігін көре алады. Егер жолдан өтетін адам саны көп болса, «ақылды» бағдаршамдар көліктерді автоматты түрде тоқтатып, жаяу жүргіншілер үшін жасыл түсін жағады. Тіпті соңғы адам өтіп кеткенге дейін қосымша бірнеше секунд беріледі. «Бұл жүргізушілер мен жүргіншілер үшін бұл маңызды», – дейді жауаптылар.

«Ақылды» бағдаршамдарда орнатылған камералар көлік ағынын реттеп қана қоймай, қоғамдық қауіпсіздікті де қадағалайды.

Рафаель Файзуллин, мердігер мекеме өкілі:

- Бағдаршам 24 сағат бойы адамдардың көмегінсіз, жасанды интеллект арқылы жұмыс істейді. Көліктің көптігі мен жаяу жүргіншілердің санын есептей отырып, қай бағытты өткізу керегін заманауи технология өзі реттейді. Ақылды бағдаршамдарды жыл соңына дейін толық іске қосу жоспарланып отыр.

Әзірге пилоттық режимде жұмыс істеп тұрған «ақылды» бағдаршамдар алдағы уақытта жедел басқару орталығына қосылады. «Қазір тұрғындардың ұсынысы мен шағымы ескеріліп, талдау жүргізіліп жатыр», – дейді тәртіп сақшылары.

Мейірім Ердәулет, ПД баспасөз хатшысы:

- Тұрғындар арасында қазір «Учаске» іс-шаралары өтіп жатыр және «Қауіпсіз жол» іс-шаралары өтіп жатыр. Осы іс-шаралар барысында көлік жүргізушілерінен сауалнамалар жүргізіліп, тағы қосымша қай шағынаудандарға орнатуға болатындығы туралы сұраныстар жүргізіліп жатыр. Енді бұл бағдаршамдардың негізгі мақсаты – жол-көлік оқиғаларының алдын алу, сондай-ақ жол кептелісінің алдын алу және тұрғындардың уақытын үнемдеу.

Жалпы қала бойынша 79 қиылысқа барлығы 600-ден аса бағдаршам орнатылады. Жоба аясында көлік пен жаяу жүргіншілер қозғалысын оңтайландыру үшін 160 мыңнан аса дерек жүйеге енгізілген.

Авторлары: Асланбек Шығыр, Айбек Байзақов, Жандос Рахметуллин