Атырау облысында құтқарушылар қыстақтағы отбасыға көмек көрсетті

Қызылқоға ауданына қарасты Сағыз ауылына жақын орналасқан қыстауда тұратын тұрғын ҚР Төтенше жағдайлар министрлігінен жәрдем сұрады.

Себебі баланың денсаулығы күрт нашарлап, шұғыл медициналық көмек қажет болған. Алайда соңғы күндері жауған мол жауын-шашын салдарынан жол қатынасы қиындап, жеңіл көлікпен ауылға жету мүмкін болмаған.

Құтқарушылар арнайы техникамен дереу жетіп, анасы мен үш баланы эвакуациялап, шамамен 60 шақырым қашықтықтағы Сағыз ауылына жеткізді. Онда оларды медицина қызметкерлеріне тапсырды.

Операция үйлесімді әрі жедел жүргізіліп, қажетті көмек уақытылы көрсетілді.

ҚР ТЖМ қолайсыз ауа райында жолға шығар алдында бағытты алдын ала жоспарлау, ауа райы болжамын қадағалау және төтенше жағдай туындаған жағдайда 112 нөміріне хабарласу қажеттігін еске салды.

Бүгін, 13:15