Атырау облысында Республика күні аясында 70 ке жуық мерекелік іс шара өтеді

Атырау облысында Республика күні мен Мемлекеттік егемендік туралы декларацияның қабылданғанына 35 жыл толуына орай 15–27 қазан аралығында мәдени, спорттық және әлеуметтік бағыттағы 69 іс-шара ұйымдастырылмақ. 

Бұл туралы облыстық Ішкі саясат басқармасының басшысы Гүлнұр Сүйеуова Өңірлік коммуникациялар қызметінде өткен брифингте хабарлады.

24 қазанда М. Өтемісұлы атындағы академиялық қазақ драма театрында салтанатты жиын өтеді. Мерекенің басты күні – 25 қазанда облыс көлемінде Мемлекеттік Туды көтеру рәсімі, салтанатты жиындар және мерекелік концерттер ұйымдастырылады. Сол күні Қ. Смағұлов алаңында атыраулықтар мен қала қонақтарына арналған үлкен мерекелік концерт пен халықтық серуен өтеді.

Мереке қарсаңында өңірде 9 жаңа әлеуметтік және білім беру нысаны пайдалануға беріледі. Олардың қатарында Атырау қаласындағы 900 орындық қос «Келешек» мектебі, Махамбет пен Қызылқоға аудандарындағы дене шынықтыру-сауықтыру кешендері, сондай-ақ Құрманғазы және Исатай аудандарындағы медициналық пункттер бар.

Сондай-ақ, облыстық Дене шынықтыру, спорт және туризм басқармасы республикалық және облыстық деңгейдегі бокс, дзюдо, футбол, үстел теннисі және ұлттық спорт түрлерінен жарыстар ұйымдастырады. Жастар мен білім беру саласына арналған «Менің Қазақстаным» сурет байқауы, «Менің Республикам» дебат турнирі, «Адал азамат» лекциялар сериясы және ғылыми конференциялар да өткізіледі.

Әлеуметтік бағыттағы шаралар қатарында «Мәңгілік жаса, Қазақстан!» экологиялық акциясы, «Жанашыр жүрек» қайырымдылық шаралары, «Republic Day» жәрмеңкелері және «Жеңілдіктер түні» бар. Ірі сауда орындарында отандық өнімдерге 15 пайыздық жеңілдіктер ұсынылады.

– Атырау облысында өтетін барлық шаралар еліміздің егемендігін дәріптеуге, жас ұрпаққа отаншылдық пен бірлік құндылықтарын насихаттауға бағытталған. Біздің басты мақсатымыз – мерекені мазмұнды және жоғары деңгейде өткізу, – деді Гүлнұр Сүйеуова.

Сонымен қатар, қала тұрғындары мен қонақтары үшін мерекелік күндері тегін қоғамдық көлік бағыттары іске қосылады.

Бүгін, 14:46