Атырау орталық теміржол вокзалының құрылысы қашан аяқталады: облыс әкімінің жауабы

Атырау облысында теміржол инфрақұрылымын ауқымды жаңғырту жұмыстары басталды. «ҚТЖ»-мен бірлесіп өңірде тоғыз вокзал қайта жөндеуден өтіп, жаңадан салынып жатыр. Жобаның жалпы құны 10,7 миллиард теңгені құрады, деп хабарлайды Атырау облысы әкімінің баспасөз қызметі.

Олжас Бектеновтің төрағалығымен өткен Үкімет отырысында Атырау облысының әкімі Серік Шәпкенов жұмыстың барысы туралы баяндады. Оның айтуынша, бес нысанда құрылыс жұмыстары толық аяқталған — қазіргі уақытта ғимараттарды пайдалануға беруге дайындық жүріп жатыр.

Нысандарды тапсыру кестесі келесідей:

2026 жылдың соңына дейін Атыраудағы орталық теміржол вокзалын қайта жаңғырту жұмыстарын толық аяқтау жоспарланып отыр.

Осы жылдың қыркүйек айына дейін Исатай, Жамансор және Мұқыр станцияларындағы құрылыс-монтаждау жұмыстары аяқталады.

Мақат, Сағыз, Доссор, Аққыстау және Құрманғазы кенттеріндегі нысандар қазірдің өзінде толық дайын. Осы бес станцияда ескірген кеңестік құрылыстардың орнына мүлдем жаңа ғимараттар бой көтерді.

Жаңартылған вокзалдарда қасбеттер (фасадтар), инженерлік және санитариялық желілер ауыстырылып, заманауи жарықтандыру мен навигация орнатылып жатыр.

«Кедергісіз орта қалыптастыруға ерекше көңіл бөлініп келеді. Ғимараттарда пандустар, заманауи ана мен бала бөлмелері, сондай-ақ мүгедектігі бар адамдарға арналған арнайы аймақтар жабдықталып жатыр. Жоспарда — көтергіш платформаларды орнату қарастырылған», — деді Шәпкенов.

Анықтама: Атырау облысында «Қазақстан темір жолы» АҚ теңгерімінде барлығы 16 теміржол вокзалы бар. Олардың көбі 2004 жылдан бері — 20 жылдан астам уақыт бойы күрделі жөндеу көрмеген. Мұнайлы астананың вокзалы соңғы рет 2015 жылы жаңартылған.

Бүгін, 15:52