Атырау түлегі Түркия басылымдарының кейіпкеріне айналды

Бес жыл бұрын Атырау қаласының №24 мектебін үздік бітірген Зарина Каримжанова Түркияға жоғары білім алуға аттанды. Ол кезде қыз түрік тілін мүлде білмеген еді. Ал бүгінде оның табысты жолы Түркияның ең ірі басылымдарында жарияланып, елге кеңінен тарады.

«Ақ Жайық» редакциясына оқырман хабарласып, өзінің сіңлісі — 22 жастағы Зарина Каримжанованың жетістігі туралы айтып берді.

Зарина Атыраудағы №24 мектепті үздік бітірген. Түркиядағы мемлекеттік университетке түсу үшін ол шетелдік талапкерлерге арналған емтиханды сәтті тапсырды. Осыдан кейін қыз Эрзинджан қаласына барып, алғашқы жылын түрік тілін үйренуге арнады. Кейін Бинали Йылдырым атындағы университетте «Экономика және менеджмент» мамандығы бойынша оқуын бастады.

Бес жылдан кейін Зарина университетті тәмамдап, факультеттің үздік түлегі атанды.

Қыздың табысты тарихы оқу орнының шеңберінен шығып, бүкіл елге тарады. Алдымен бұл туралы Түркияның мемлекеттік ақпарат агенттігі Anadolu Ajansı хабарлады, кейін ондаған ұлттық және аймақтық БАҚ жариялады.

Түрік басылымдарында: «Қазақстаннан келген студент тіл білмей келді, ал бірнеше жылдан соң факультеттің үздік түлегі болды», деген бір тақырып қайталанды.

Диплом тапсыру рәсімінде университет ректоры, профессор Акин Левент, оқу орнында Әзербайжан, Қазақстан, Өзбекстан және Түрікменстаннан келген студенттер білім алып жатқанын атап өтті.

«Бүгін біз тамаша мысалды көріп отырмыз. Қазақстаннан келген студентіміз Зарина факультеттің үздік түлегі атанды. Бұл бізді ерекше қуантады, себебі оның жетістігі — өз елінде де, біздің елімізде де жоғары нәтижелерге қол жеткізе алғанының дәлелі», — деді ректор.

Заринаның өзі Түркияда оқуды армандағанын айтады.

«Мен осында арманымды орындау үшін келдім. Жаңа достар таптым, мәдениетпен таныстым. Халықтарымыздың ортақ түркі тамыры болғандықтан, бейімделу мен үшін қиын болмады», — дейді ол.

Диплом алғаннан кейін жас түлек оқуын жалғастырып, қытай тілін үйренуді жоспарлап отыр.

Анастасия ШЕРСТЯНКИНА

Кеше, 19:40