Атырауда әкімдік тасқын кезінде апатты деп танылған үйлерін бұзбаған 99 тұрғынды сотқа берді

Жалпы ауданда 2957 үй тасқыннан зардап шекті. Оның 1420-сы апатты деп танылды. Қалғаны күрделі жөндеуді талап етті.

Жылыой ауданының әкімі Жұмабек Қаражановтың сөзінше, зардап шеккен тұрғындар арасында өтемақы алса да, үйін бұзбай, жөндеп алғандар бар.

— 2024 жылы өтемақы төлеп жатқан кезде «үйіміз күрделі жөндеуге жатпайды, апатты деп танып беріңіздер» деп келген азаматтар бар. Заң бойынша ол үйлерді бұзу керек. Жаңа баспана салу үшін үкімет қаржы берді. Кей азаматтар үйлерін бұзбай, күрделі жөндеу жасап, қалған қаржыны басқа мақсатта жұмсады, — деді аудан әкімі.

Аудан әкімінің айтуынша, осы мәселе бойынша жиналған материалдар аудандық сотқа жіберілген. Алдымен ескерту беріледі, оны елемеген жағдайда үйлерді бұзу міндеттеледі.

— Өтемақы берілді. Ең бастысы — адамдардың қауіпсіздігі. Негізі жауапкершілік азаматтардың өз мойнында. Дегенмен бұл мәселеге бейжай қарай алмаймыз, — деп толықтырды Жұмабек Қаражанов.

Мәселеге қатысты істер сотта қаралып жатыр. Тараптардың пікірін тыңдап жатыр. 

Ресми ақпаратқа сүйенсек, қазіргі уақытта ауданда тасқыннан зардап шеккен бір ғана тұрғын тұрғын үй мәселесіне қатысты өтемақы алмаған. Өйткені, ол баспананы бағалау құнымен келіспейді. Әкімдік пен тұрғын арасында сот болып, азамат соттың екі сатысынан да жеңіліп қалған.

Бұған дейін Жылыой ауданының Аралтөбе учаскесінде су қоймасын салу жоспарланып отырғанын жазған едік.