Атырауда кәсіпкердің құқығы қорғалып, салық органының шешімдері заңсыз деп танылды

Көрнекі сурет

Атырау облысының мамандандырылған ауданаралық экономикалық соты (МАӘС) жеке кәсіпкердің пайдасына шешім шығарып, Мемлекеттік кірістер басқармасының екі қаулысын заңсыз деп тапты.

Сотқа жүгінуге себеп — салық органының кәсіпкерді «күмәнді мәмілелерге» қатысы бар деп айыптап, келесі шектеулерді енгізуі болды:

бұзушылықтарды жою туралы хабарламаны орындалмаған деп тану; электрондық шот-фактураларды (ЭШФ) шығаруға тыйым салу.

Бұл шешімдер кәсіпкердің нақты жұмыс істеуіне кедергі келтірген.

Алайда сот кәсіпкердің Салық кодексінің 96-бабына сәйкес барлық қажетті түсініктемелер мен дәлелдейтін құжаттарды уақытылы тапсырғанын анықтады. Сонымен қатар, салық органдары мәмілелердің жалған екендігін дәлелдейтін нақты айғақтар ұсынбаған.

Сот камералық тексеру шеңберінде болжамға сүйеніп, кәсіпкерлік қызметті шектеу заңсыз екенін атап өтті. Шаруашылық операциялардың сенімділігін тексеру тек салықтық тексеру арқылы жүргізілуі тиіс.

Іс қорытындысы бойынша сот:

2025 жылғы 26 және 27 мамырда қабылданған екі шешімнің күшін жойды; кәсіпкерге төленген 39 320 теңге мемлекеттік бажды қайтаруды міндеттеді; қаулы заңды күшіне енгеннен кейін бір ай ішінде орындалуы тиіс екенін белгіледі.

Осы шешім арқылы сот салық төлеушінің негізсіз шектеулерден қорғалу құқығын растады және камералық тексеру жүргізу кезінде заң талаптарын қатаң сақтау қажеттігін ескертті.

Бүгін, 12:03