Атырауда кәсіпорындар көгалдандыруға белсенді тартылмақ

Атырау облысында өңірді көгалдандыруға бағытталған жаңа меморандум жасасу мәселесі талқыланды. Бұл бастама облыс әкімінің орынбасары Марат Мурзиевтің төрағалығымен өткен жиында көтерілді, деп хабарлайды Өңірлік коммуникациялар қызметі.

Жиынға Экология департаменті, санитариялық-эпидемиологиялық бақылау департаменті, Атырау қаласы әкімдігі және өңірдегі ірі кәсіпорындар — «KPI», «West Dala», «Атырау жылу электр орталығы», «Силлено», «GPC Investment», «Рауантех», «Бутадиен», «KMG PetroChem» өкілдері қатысты.

Меморандумның негізгі мақсаты — бизнес құрылымдарын өңірдің экологиялық ахуалын жақсартуға, жасыл аймақтарды көбейтуге және қоғамда экологиялық мәдениетті қалыптастыруға жұмылдыру. «Табиғатты қорғау — тек мемлекеттік емес, бүкіл қоғамның ортақ міндеті. Сондықтан кәсіпорындардың экологиялық жауапкершілігін арттыру маңызды», — деді Марат Мурзиев.

Бұл бағыттағы жұмыстар 2021 жылдан бері жүзеге асып келеді. Бұған дейін облыс әкімдігі «Теңізшевройл», «НКОК», «АМӨЗ», «ҚазМұнайГаз» және «Ембімұнайгаз» секілді ірі мұнай-газ компанияларын көгалдандыруға тартқан болатын. Кәсіпорындарға арнайы жер телімдері бөлініп, 5–10 жылдық мерзімге жасыл аймақтар құру жоспарланған.

Қазіргі таңда қала маңы мен аудандарда 327 гектар аумаққа 311 мыңнан астам ағаш көшеті отырғызылған. Бұл — өңірдің экологиялық келбетін жақсартуға бағытталған нақты қадамдардың бірі.

Бүгін, 16:36