Атырауда Каспий маңы елдерінің университеттерінің Бас ассамблеясы өтті

Атырауда Каспий маңы елдерінің университеттері мен ғылыми-зерттеу орталықтарының XXVII Бас ассамблеясы өтті. Онда Қазақстан, Ресей, Әзірбайжан, Иран және Түрікменстандағы жетекші ЖОО ректорлары, ғалымдары мен сарапшыларынан құралған 100-ге жуық қатысушы бас қосты.

Форумның ашылуында Атырау облысы әкімінің орынбасары Қайрат Нұртаев пен жиынға келген қонақтар құттықтау сөз сөйледі және ҚР Ғылым және жоғары білім министрі Саясат Нұрбектің құттықтау хаты оқылды.

- Каспий маңы елдері университеттерінің қауымдастығының мақсаты – ғылымды, білім беруді және халықаралық ынтымақтастықты дамыту.

Қазақстан әрдайым әріптестікті және білім алмасуды қолдайды. Каспий маңы өңірі ғылым, білім және прогресс орталығына айналып, жастар үшін жаңа мүмкіндіктер ашуда, - деді облыс әкімінің орынбасары Қайрат Нұртаев.

Ассамблея барысында Каспий экожүйесін қорғау, аймақтық зерттеу жобаларын дамыту және инновациялық ғылыми шешімдерді енгізу бағыттары талқыланды. 

Сонымен қатар жоғары оқу орындары арасында ынтымақтастық туралы меморандумдарға қол қою рәсімі өтті.

- Бұл басқосу – ғылым мен білім саласындағы өзара ынтымақтастықты нығайтатын алаң. Сондықтан осы жиынның маңызы зор деп есептеймін, - деді Франциядағы Пуатье университетінің доценті Жюли Рансон.

Форум шеңберінде Каспий өңірінің тұрақты дамуына арналған бірлескен бастамалар ұсынылып, ғылым мен білім интеграциясын нығайтуға бағытталған жаңа жобалар таныстырылды.

Суреттер: Өңірлік коммуникация қызметі

Бүгін, 16:11