Атырауда мүгедектігі бар адамдарға өз өзіне қызмет көрсету дағдылары үйретілуде

7–14 қазан аралығында Атырауда «Тиімді реабилитация лагері» ұйымдастырылып, облыс орталығы мен аудандардан мүгедектігі бар азаматтар қатысуда. Лагерьдің негізгі мақсаты – қатысушыларды өз-өзіне қызмет көрсету дағдыларын жетілдіруге үйрету, сенімділікті арттыру және белсенді өмір салтын қалыптастыру.

Бағдарлама аясында жұлын және омыртқа жарақатын алған, арба пайдаланатын адамдарға арналған теориялық және практикалық сабақтар өткізілді. Қатысушылар арбада жүру техникасын, кедергілерден өту тәсілдерін, ойық жара мен контрактураның алдын алу жолдарын, сондай-ақ өзін эмоционалды қолдауды үйренді. Сонымен қатар жүзу, аэробика және фитнес жаттығулары да қарастырылған.

Нұсқаушы Есболат Балбаев лагерьдің ерекше тұсы – жол көрсетушілердің де арба қолданатынын атап өтті. «Биылғы бағдарлама сегіз күнге дейін ұзартылды. Алғашқы екі күн нұсқаушы ассистенттер – әлеуметтік қызметкерлер мен медициналық колледж студенттерін даярлауға арналды. Бұл оларға болашақта мүгедектігі бар адамдарға кәсіби көмек көрсетуде тәжірибе береді», – деді Балбаев.

Лагерь «Мүгедектігі бар адамдарды тиімді реабилитациялау» жобасы аясында ұйымдастырылды. Жобаны «Біз де адамбыз» қоғамдық қоры «Тенгизшевройл» компаниясының қолдауымен жүзеге асыруда. 2021 жылдан бері Атырау мен Құлсары қалаларында 15 реабилитация лагері өткізіліп, 100-ден астам адам толыққанды өмірге бейімделуге мүмкіндік алған.

Бүгін, 19:16