Облыста 3 478 мүгедектігі бар адам әлеуметтік қызмет алды

Биыл облыста 3 478 мүгедектігі бар азамат Әлеуметтік қызметтер порталы арқылы қажетті қызметтерді пайдаланды.

Сонымен қатар 795 адам арнайы әлеуметтік қызмет көрсету орталықтарында қолдау алды, деп хабарлады Өңірлік коммуникациялар қызметі.

Қазіргі таңда өңірде 27 308 мүгедектігі бар адам тұрады. Оларға төрт арнаулы орталық пен облыстық оңалту орталығы қызмет көрсетеді.

Облыстық мүгедектерді сауықтыру орталығының басшысы Ғалия Бижанованың айтуынша, І және ІІ топтағы азаматтар жолдама негізінде қабылданады. Мұнда сумен емдеу, физиотерапия, массаж және емдік дене шынықтыру секілді алты бағыт бойынша оңалту жүргізіледі. Орталықта 55 орын бар: 35-і стационарлық, 20-сы күндізгі бөлім. Әрбір қызмет алушы 10 күн ем қабылдайды. Жылына шамамен 1100 адамға оңалту көмегі көрсетіледі.

Сонымен қатар облыста қозғалысы шектеулі азаматтарға арналған 145 инватакси қызметі жұмыс істейді. Жыл басынан бері 153 адамға 306 тасымал ұйымдастырылған.

Әлеуметтік инфрақұрылымды бейімдеу бағытында «AMANAT» партиясының «Кедергісіз келешек» жобасы жүзеге асырылуда. Жоба аясында 2023–2027 жылдары 1,8 мыңнан астам нысанды бейімдеу жоспарланған. Былтыр INVAGOV порталында жоспарланған 444 нысан толық енгізілген.

Қауіпсіздікті күшейту үшін №1–4 орталықтар мен облыстық оңалту орталығына 335 бейнебақылау камерасы орнатылып, олар Ішкі істер органдарының жедел басқару жүйесіне қосылды.

Бүгін, 11:51