QazaqGaz тексерісі: Қашағандағы газ өңдеу зауытының құрылысы қалай жүріп жатыр

видеодан скриншот

Атырау облысында «QazaqGaz» ұлттық компаниясының Директорлар кеңесі Қашаған кен орнында жылына 1 млрд текше метр газ өңдейтін газ өңдеу зауытының құрылысын тексерді. Компания басшылығы құрылыс мерзімдерін сақтауды, өнеркәсіптік қауіпсіздік стандарттарын орындауды, сондай-ақ жергілікті мамандар мен қазақстандық кәсіпорындарды жобаға белсендірек тартуды талап етті.

27 қазанда «QazaqGaz» ҰК» АҚ Директорлар кеңесі Атырау облысында көшпелі отырыс өткізді. Мұндай деңгейдегі іс-шара алғаш рет тікелей өндірістік алаңда ұйымдастырылды.

Жұмыс сапарының негізгі мақсаты Қашаған кен орнында салынып жатқан газ өңдеу зауытының құрылыс барысымен танысу болды.

Директорлар кеңесінің мүшелері құрылыс алаңын аралап, құрылыс-монтаждау жұмыстарының орындалу барысын бағалады.

Құрылыс барысы ерекше бақылауда

Сапар аясында «QazaqGaz» басшылығы бас мердігер ұйымдардың өкілдерімен кеңейтілген үйлестіру кеңесін өткізді.

Жиында құрылыс кестелерінің сақталуы, өнеркәсіптік және экологиялық қауіпсіздік талаптарының орындалуы, сондай-ақ жобаны іске асыруға отандық кәсіпорындардың қатысуы мәселелері қаралды.

Қазақстандық мамандар мен жергілікті тауар өндірушілерді тартуға ерекше назар аударылды.

«Қашағандағы газ өңдеу зауытының құрылысы — Мемлекет басшысы мен Қазақстан Республикасының Үкіметі ерекше бақылауға алған, мемлекеттік маңызы бар стратегиялық жоба. Зауытты пайдалануға беру шикі газды өңдеу көлемін арттырып қана қоймай, ішкі нарыққа арналған тауарлық газдың ресурстық базасын ұлғайтуға мүмкіндік береді», — деп атап өтті «QazaqGaz» Директорлар кеңесінде.

Компанияның мәлімдеуінше, кәсіпорынды сәтті іске қосу NCOC компаниясымен тығыз өзара іс-қимылға және мердігер ұйымдардың ресурстарды уақытылы жұмылдыруына байланысты.

Газ өңдеу зауыты қашан іске қосылады?

«QazaqGaz» компаниясының бұған дейін жариялаған мәліметтеріне сәйкес, 2026 жылғы шілдеде газ өңдеу зауытының құрылысындағы EPC жұмыстарының жалпы орындалу деңгейі шамамен 60%-ды құраған.

Сол уақытқа дейін құрылыс алаңына негізгі жабдықтардың 97%-ы жеткізілген, ал жобаға тартылған мамандар саны шамамен 2 мың адамға жеткен.

7 шілдеде «QazaqGaz» басқарма төрағасы Әлібек Жамауов Үкімет отырысында құрылыс-монтаждау жұмыстарын 2026 жылдың соңына дейін аяқтау жоспарланып отырғанын хабарлады.

Сонымен қатар Энергетика министрлігі кәсіпорынды пайдалануға беру мерзімі ретінде 2027 жылды белгіледі.

Зауыт іске қосылғаннан кейін жыл сайын 1 млрд текше метрге дейін шикі газ өңдеп, шамамен 727 млн текше метр тауарлық газ өндіре алады.

Қосымша газ көлемі Қазақстанның ішкі газ нарығының ресурстық базасын кеңейтуге бағытталады.

Атырау облысында тағы бір газ нысаны салынуда

Жұмыс сапары барысында Директорлар кеңесі Eskene LPG сұйытылған мұнай газын өңдеу терминалының құрылыс алаңына да барды.

Нысанда іргетас қалау және негізгі технологиялық жабдықтарды монтаждау жұмыстарын қоса алғанда, құрылыс-монтаждау жұмыстары жалғасуда.

Жоба Қашаған кен орнынан жеткізілетін сұйытылған мұнай газын қабылдауға, ауыстырып тиеуге және фракцияларға бөлуге арналған инфрақұрылым құруды көздейді.

Жобаны іске асыру ішкі нарықты сұйытылған газбен қамтамасыз етуге және газ-химия өнеркәсібін одан әрі дамытуға ықпал етуі тиіс.

«QazaqGaz» компаниясы екі жобаның да іске асырылу барысын бақылауды жалғастыратынын мәлімдеді. Бұл ретте құрылыс мерзімдерінің сақталуына, жұмыстардың сапасына және өнеркәсіптік қауіпсіздік талаптарының орындалуына ерекше көңіл бөлінеді.

Бүгін, 20:46