Қарашығанақ газ өңдеу зауытының құрылысы жеделдетіліп жатыр

АСТАНА, 13 сәуір – Sputnik. Астанада Қарашығанақ газ өңдеу зауытының құрылысы мәселелері бойынша кеңес өтті.

Энергетика министрі Ерлан Ақкенженов қуаттылығы жылына 5 млрд м³ дейін газ өңдейтін Қарашығанақ ГӨЗ-ін салу Газ саласын дамытудың 2029 жылға дейінгі кешенді жоспарының негізгі элементі екенін атап өтті.

Ол сондай-ақ келіссөздің созылуы жобаның белсенді құрылыс кезеңіне өтуіне кедергі келтіріп отырғанын айтты.

"Қазақстан үшін бұл зауыттың маңызы зор, сондықтан жобаның басталу мерзімін шексіз кейінге қалдыруға жол берілмейді. Мемлекетке нәтиже керек. Жоба қарқынды түрде және біздің ұлттық экономикалық мүдделерімізге толық сәйкес іске асырылуға тиіс. Консорциумнан сындарлы және жедел ұстаным күтеміз", — деп қадап айтты Ерлан Ақкенженов.

Қазіргі уақытта жобаның экономикалық тиімділігі расталды және Қытайдың "CITIC Construction" корпорациясымен ынтымақтастықтың базалық принциптері туралы келісімге қол қойылды.

FEED (базалық жобалау) кезеңіне дайындық жүріп жатыр, сондай-ақ жер учаскесі, инфрақұрылым және шикізат базасымен қамтамасыз ету мәселелері пысықталуда.

Стратегиялық жобаның бірыңғай операторы болып "QazaqGaz" ұлттық компаниясы белгіленді.

Қатысушылар Қарашығанақ жобасының шетелдік акционерлерімен келіссөздер барысына ерекше назар аударды.

Министр шикі газды кепілді жеткізу, баға белгілеу (ішкі нарықтың рентабельділігін қамтамасыз ету үшін әділ босату бағасын қалыптастыру) және зауытты кен орнының қолданыстағы инфрақұрылымымен интеграциялау (brownfield) мәселелерін тезірек реттеу қажеттігін атап өтті.

Сонымен қатар кеңес барысында газды кәдеге жаратқаны үшін төлем механизмін (Evacuation fee) әділ реттеу мәселесі көтерілді.