Елде дрон иелеріне қатысты жаңа талаптар енгізілмек

АСТАНА, 27 қазан – Sputnik. Үкімет бекіткен 2029 жылға дейінгі Ұшқышсыз жүйелерді дамытудың кешенді жоспары дрондардың иелеріне қатысты бірқатар талаптарды қамтиды, деп хабарлады Цифрлық даму министрлігі.

"Дрон иелері үшін міндетті азаматтық-құқықтық жауапкершілікті сақтандыруды енгізу, байланыс арналарына қатысты киберқауіпсіздік талаптарын белгілеу, сондай-ақ мамандандырылған Халыққа қызмет көрсету орталықтары (ХҚКО) арқылы операторларға сертификаттар беру жоспарланып отыр", – деп мәлімдеді министрлік.

Ұшқышсыз ұшу аппараттарын қадағалауға қатысты кейбір функциялар Ішкі істер министрлігіне беріледі.

"Ұшу жиілігінің артуы қоғамдық тәртіпті сақтау үшін алдын алу шараларын қабылдауды талап етеді. Осыған байланысты, нормативтік-құқықтық базаны қайта қарау аясында, ұшқышсыз жүйелерді пайдалану мен айналымын бақылау және қадағалауға қатысты жекелеген мемлекеттік функциялар Ішкі істер министрлігіне беріледі", — делінген хабарламада.

Сондай-ақ, ұшқышсыз көлік және технологиялар саласындағы мамандарды даярлауға ерекше назар аударылмақ.

"Барлық өңірдің мектептерінде авиамодельдеу үйірмелері ашылып, заманауи STEAM-зертханалар ұшқышсыз ұшу аппараттарына арналған арнайы жабдықтармен қамтамасыз етіледі. Сонымен қатар, бастапқы әскери дайындық бағдарламаларына ұшқыш болудың негізгі дағдылары мен техникалық сауаттылық элементтері енгізіледі. Техникалық және кәсіптік, сондай-ақ жоғары білім беру деңгейлерінде оқу бағдарламалары нақты еңбек нарығының талаптарына сәйкес жаңартылады", — деп хабарлады ведомство.

Сондай-ақ, ұшқышсыз технологияларға бағытталған, университет деңгейіндегі жыл сайынғы жарыстарды ұйымдастыру жоспарланып отыр.

Бұған қоса, бұл бастама кемінде 1000 жоғары білікті жаңа буын мамандарын — операторларды, жобалаушы инженерлерді, ендірілген бағдарламалық қамтамасыз ету мен жасанды интеллект әзірлеушілерін, сондай-ақ киберқауіпсіздік және техникалық қызмет көрсету саласындағы сарапшыларды — даярлауды көздейді.

"Басым қадамдардың бірі – Ұшқышсыз ұшу аппараттары жүйелеріне арналған бірыңғай цифрлық платформаны және ұшқышсыз ұшу аппараттары қозғалысын басқарудың автоматтандырылған жүйелерін (UTM) енгізу болмақ. Жобаның негізгі мақсаты – қағазбастылықты толығымен жою және азаматтар, бизнес пен мемлекеттік органдар арасындағы өзара іс-қимылдың барлық түрін ашық электрондық форматқа көшіру", - дейді министрлік.

Өтінімдер беру, есеп жүргізу, ұшу аппараттарын тіркеу және ұшу бағыттарына рұқсатты жедел алу – мұның бәрі бірыңғай цифрлық қызмет арқылы жүзеге асырылмақ.