5 млн теңгеге дейінгі несие есептен шығарылады : желідегі видеоға қатысты ескерту жасалды

АСТАНА, 27 қазан – Sputnik. Президент жанындағы орталық коммуникациялар қызметінің жалған ақпаратқа қарсы іс-қимыл орталығы желіде тараған ақпаратты тексеріп шықты, деп хабарлайды Sputnik Қазақстан.

TikTok желісінде 18 жастан асқан қазақстандықтардың 5 млн теңгеге дейінгі несиелері мен айыппұлдарын есептен шығаруға уәде беретін бейнероликтер тарады.

Профильдегі сілтеме ресми әлеуметтік көмек көрсететін сервис ретінде ұсынылған сайтқа апарады. Алдымен адамның туған жылын көрсету керек. Одан кейін Telegram желісіне өтуге ұсыныс жасалады. Ал кері санақ таймері уақыттың шектеулі екенін көрсетіп, пайдаланушыны асығыс шешім қабылдауға итермелейді.

"Telegram-да авторизацияны растаған пайдаланушы іс жүзінде бөгде адамдарға өз аккаунтына, жеке хат алмасуларына және оған байланысты деректерге қол жеткізуге мүмкіндік береді", - дейді орталық мамандары.

Техникалық тексеріске сәйкес, бұл фишинг ресурс спамды да таратады. Ал домен шамамен небәрі 17 күн бұрын тіркелген. Аталған белгілер мемлекеттік көмек алу сылтауымен жасалатын фишингтік алаяқтық қаупі бар екенін көрсетеді.

Күдікті сайтты анықтау жолдары:

Домен атын мұқият тексеріңіз. Қазақстанның ресми мемлекеттік ресурстары тек .gov.kz домендік аймағын пайдаланады. Ал басқа да көптеген ресми ұйымдардың сайттары негізінен .kz аймағын қолданады.

Бейтаныс домендік аймақтарға назар аударыңыз. Егер сайт атауы мысалы .cfd, .xyz, .top немесе .click сияқты бейтаныс домендік аймақтармен аяқталса, оны мұқият тексерген жөн.

Сайттың сыртқы көрінісіне ғана сенбеңіз. Сайтта мемлекеттік рәміздер, логотиптер мен қорғалған қосылым байланыс белгілерінің болуы оның мемлекеттік органға тиесілі екенін ешқашан растамайды.

Уәделердің шынайылығын тексеріңіз. Несиелер мен айыппұлдарды есептен шығару туралы қандай да бір ақпарат тараса, оны тек мемлекеттік органдардың ресми ақпарат көздерінен қараңыз. Күдікті авторизацияны растамаңыз.

Егер сілтеменің немесе қосымшаның қайдан шыққанына және кімге қандай құқық беріп жатқаныңызға сенімді болмасаңыз, Telegram және басқа да жеке аккаунттарыңызға рұқсат бермеңіз.

Егер күдікті сілтеме арқылы кіріп қойған болсаңыз, Telegram параметрлеріне кіріп, белсенді сеанстарды тексеріңіз, бейтаныс құрылғыларды өшіріңіз және екі кезеңді аутентификацияны қосыңыз.

"Сырт көзге сенімді көрінетін мұндай жарияланымдардың артында азаматтардың жеке деректері мен аккаунттарына қол жеткізуді көздейтін фишингтік схемалар жасырынуы мүмкін. Сондықтан құрғақ уәделерге сенбей, ақпаратты ресми дереккөздер арқылы тексеріп, күмәнді сілтемелер мен аккаунтқа кіруге рұқсат беру туралы сұрауларға мұқият қараған жөн", - деп атап көрсетті мамандар.