Балағат сөздер үшін жауапкершілік: Астанада жүргізуші бес тәулікке қамалды

Астанада Hyundai Accent көлігінің 32 жастағы жүргізушісі артқы әйнегіне балағат сөздер жазылған жапсырма жапсырғаны үшін бес тәулікке әкімшілік қамаққа алынды. Көлік коммуналдық тұраққа қойылды. Тағы бір автокөлік жүргізушісі қатты шу шығаратын газ шығару жүйесі үшін жауапқа тартылды.

Құқық бұзушылықтар полиция қызметкерлері жол қозғалысы ережелерінің сақталуын, көліктердің техникалық жай-күйін және айналадағыларға қолайсыздық тудыратын өзге де заң бұзушылықтарды тексеретін «Құқықтық тәртіп» жедел-профилактикалық іс-шарасы барысында анықталды.

Оқиғалардың бірі Достық және Мәңгілік Ел көшелерінің қиылысында болған. Полиция қызметкерлері Hyundai Accent көлігін тоқтатып, тізгінінде елорданың 32 жастағы тұрғыны Нұрсұлтан Дюсекейев отырғанын анықтады.

Тексеру кезінде инспекторлар көліктің артқы әйнегіне жапсырылған үлкен жапсырмаға назар аударған. Онда әдепсіз сөздер мен дөрекі тіркестер жазылған.

Жүргізуші ұсақ бұзақылық жасағаны үшін әкімшілік жауапкершілікке тартылды. Сот оған бес тәулікке әкімшілік қамаққа алу жазасын тағайындады. Ал автокөлік коммуналдық тұраққа қойылды.

Осы профилактикалық іс-шара аясында полиция қызметкерлері Mercedes көлігін басқарған 26 жастағы жүргізушіні де тоқтатқан.

Тексеру барысында ер адамның тиісті рұқсатсыз көліктің газ шығару жүйесінің құрылымын өзгертіп, қатты шу шығаратын резонатор орнатқаны анықталды.

Полицияның мәліметінше, көліктен шыққан қатты шу елорда тұрғындарына қолайсыздық тудырған.

Нәтижесінде жүргізуші әкімшілік жауапкершілікке тартылып, оның көлігі де коммуналдық тұраққа қойылды.

Полиция көлік құралдарының құрылымын өз бетінше өзгертуге, әсіресе бұл жол қозғалысы қауіпсіздігіне әсер ететін болса, тыйым салынғанын еске салды.

Құқық қорғау органдары жүргізушілер заң талаптарын сақтап, айналадағыларға құрметпен қарауға, артық шу мен басқа да қолайсыздықтар туғызбауға міндетті екенін атап өтті.

Бүгін, 15:44