Мектептерде күзгі демалыс басталды

АСТАНА, 25 қазан – Sputnik. Қазақстанда мектептерде күзгі демалыс басталды, деп хабарлады Оқу-ағарту министрлігі.

"Күзгі демалыс 2026 жылғы 26 қазаннан 1 қарашаға дейін қоса есептегенде жеті күнге созылады. Оқу 2026 жылғы 2 қарашада жалғасады", - деп жазылған хабарламада.

Министрлік күзгі демалыс кезінде балалар отбасымен уақыт өткізіп, кітап оқып, спортпен және шығармашылықпен айналыса алатынын атап өтті.

"Мектептер балалардың бос уақытын мазмұнды өткізуге арналған шаралар ұсына алады. Оларға қатысу ерікті. Балалардың қызығушылығы мен отбасының жоспары ескерілуге тиіс", - дейді мамандар.

Қазақстанда 2,9 мыңға жуық қосымша білім беру ұйымы жұмыс істейді. Өнер және музыка мектептері, оқушылар сарайлары, спорт мектептері мен шығармашылық орталықтар балаларға қызығушылығына сай қабілетін дамытуға мүмкіндік береді.

"Шаралар ұйымдастырылған жағдайда оларды өткізуге және балалардың қауіпсіздігіне жауапты тұлғалар алдын ала белгіленеді. Балалардың қатысуы ата-аналармен келісіледі. Мектептен тыс іс-шаралар кезінде балалардың қауіпсіздігіне жауапты ересектердің қасында болуы міндетті", - деп жазылған ведомство хабарламасында.

Оқу-ағарту министрлігі ата-аналарды балаларға үйде, көшеде және интернетте қауіпсіздік ережелерін сақтаудың маңыздылығын түсіндіруге және оларды сақ болуға шақыруға үндеді.