​АМӨЗ маңындағы үйлердің тұрғындарын көшіре бастайды: Атырауда жұмыс комиссиясы құрылды

Атырауда Атырау мұнай өңдеу зауытының санитарлық-қорғау аймағына (СҚА) кірген үйлердің тұрғындарын көшіру жұмыстары басталды. Жылжымайтын мүлікті алу және өтемақы төлеу мәселелерін шешу үшін арнайы комиссия құрылды.

Әкімдік түсіндіргендей, АМӨЗ санитарлық-қорғау аймағының шекаралары "Атмосферадағы ауаны қорғау республикалық ғылыми-зерттеу орталығы" ЖШС мамандары жүргізген атмосферлық ауаны бір жылдық зерттеу және физикалық факторларды өлшеу нәтижелері негізінде бекітілді.

Атырау қаласы әкімдігінің 2026 жылғы 22 қазандағы қаулысымен ведомствоаралық жұмыс комиссиясы құрылды. Оның құрамына жергілікті атқарушы органдардың, зауыттың өкілдері және іргелес аудандардың бастамашыл тұрғындары кірді.

Қазір әкімдік "Азаматтарға арналған үкімет" мемлекеттік корпорациясымен бірлесіп алынуға тиіс жер учаскелерінің меншік иелері мен пайдаланушыларының тізімін нақтылап жатыр.

Комиссия немен айналысады?

өтініштерді қарап, тұрғындармен жеке кеңес жүргізеді;көшіру тәртібі мен шарттарын түсіндіреді;меншік иелерін баспананы бағалау нәтижелерімен және өтемақы мөлшерімен таныстырады.

2026 жылдың қараша айының ортасында шенеуніктер мен АМӨЗ өкілдері халықтың барлық сұрақтарына жауап беру және жұмыстың аралық нәтижесін хабарлау үшін зауытқа іргелес аудандардың тұрғындарымен үлкен кездесу өткізуді жоспарлап отыр.

Алынуға тиіс жылжымайтын мүлік нысандарының түпкілікті тізімі мен олардың құқықтық мәртебесі заңды процедуралардың аяқталуына қарай жарияланады.

Еске сала кетейік, жер учаскелерін мемлекет муқтаждығы үшін қайтару процедурасы Қазақстан Республикасының Жер кодексімен реттеледі және жергілікті атқарушы органдардың құзыретіне жатады.

Бүгін, 10:18