Атырау облысында кеміргіштерге қарсы күрес комиссиясы құрылды

Атырау облысында кеміргіштердің көбеюіне байланысты жедел шаралар қабылдануда. Обаға қарсы күрес станциясының басшысы Лариса Нұрмағамбетованың айтуынша, Атырау қаласына жақын ауылдар мен Махамбет ауданында тышқан тектес кеміргіштердің күрт артуы анықталған.

Алдын ала болжам бойынша, бұған күннің жылы болуы және өткен жылғы су тасқынынан кейін кеміргіштердің жаппай көбеюіне қолайлы жағдайдың қалыптасуы себеп болуы мүмкін. Бұл туралы облыстық өңірлік коммуникациялар қызметі хабарлайды.

Мамандар зиянкестерден тұрақты түрде сынама алып, инфекциялық аурулардың бар-жоғын тексеріп отыр. Бүгінге дейінгі зертханалық талдаулардың барлығы теріс нәтиже көрсеткен.

Кеміргіштердің таралуын шектеу және ошақтарды жою мақсатында облыс әкімінің орынбасары Қайрат Нұртаев төрағалық ететін арнайы комиссия құрылды. Оның құрамына:

обаға қарсы станция,

кәсіпкерлік және өнеркәсіп басқармасы,

ауыл шаруашылығы басқармасы,

санитарлық-эпидемиологиялық қызмет,

Махамбет ауданы әкімдігі,

дезинфекция ұйымдары кірді.

Қазір Махамбет ауданында екі мамандандырылған ұйым улау жұмыстарын жүргізуде. Қ. Нұртаевтың тапсырмасымен “Ақжайық” табиғи резерваты трактор бөлді, Жайық өзенінің жағалауы 0,5–1 метр тереңдікте тазартылып, улау жұмыстары басталды. Зиянкестер табылған барлық ауылдар дәл осы әдіспен өңделмек.

Кеміргіштерге қарсы жұмыстарға қосымша төрт ұйым тартылғалы отыр: екеуі — Атырау қаласында, екеуі — Махамбет ауданында жұмыс істейді. Қала аумағында улау шаралары Жайық өзенінің екі бетін қамтиды — Береке және Қайыршақты ауылдық округтері маңында жүргізіледі.

— Жедел штабтың негізгі міндеті — зиянкестер шоғырланған ошақтарды жою, популяциясын азайту және олардың таралуын толық тоқтату. Қауіпті сейілту үшін жұмысты дереу бастау қажет. Ірі кәсіпорындарда да дератизация ұйымдастыру тапсырылды, — деді Қ. Нұртаев.

Мамандардың айтуынша, қолданылған удың әсері 7–10 күн ішінде байқалуы тиіс. Қолданылатын препараттар санитарлық талаптарға сай және адамдар мен үй жануарларына қауіпсіз.

Бүгін, 17:50