Павлодар облысында өртке қарсы күрес күшейді

Павлодар облысында өртке қарсы күрес қызметі кезекті рейд ұйымдастырды. Мамандардың айтуынша, жылу маусымы басталғалы бері өңірде 14 өрт оқиғасы тіркелген. Оқыс жағдайлардың басым бөлігі пешті дұрыс пайдаланбау мен электр құралдарының ақауларынан болған. Осыған байланысты өртке қарсы қызмет өкілдері бақылауды күшейтіп, ауыл-аймақтарда алдын алу және түсіндіру жұмыстарын жалғастыруда. 

Ақсудың ауылдық аймағына қарайтын Евгеньевка ауылы бекер таңдалмаған. Наурыз айында жекеменшік тұрғын үйде газ баллоны жарылып, екі адам қаза тапқан еді. Құтқарушылар ауылға арнайы барып, жекеменшік сектор тұрғындарымен кездесті.

Оразбек Уәлиханов, облыстық ТЖД Мемлекеттік өрт бақылау басқармасының бастығы:

- Тұрғындарымызға рейдтік іс-шаралар барысында ең қарапайым, өрт қауіпсіздік ережелерін сақтау бойынша және сол осы жылыту маусымы кезінде қолданылатын пештерді ақауларын уақытылы жою және де осы үйдегі балаларды қараусыз қалдырмауға, өрт болған жағдайда дереу 101, 112 нөмірлеріне хабарлау туралы түсіндіру жұмыстары жүргізілуде.

Көпбалалы және аз қамтылған отбасыларға ерекше көңіл бөлінеді. Жергілікті атқарушы органдар мен үкіметтік емес ұйымдардың атсалысуымен биыл әлеуметтік осал санатқа жататын тұрғындардың үйіне 629 улы газды анықтайтын құрылғы орнатылды. Пеш мұржалары тазартылды.

Чароз Әбдірашитова, ауыл тұрғыны:

- Үлкен рақмет, қуаныштымыз, өйткені біз жұмысқа кеткен кезде балалар жалғыз қалады. Сол кезде бізге өте пайдасын тигізеді. Қыс бойы пешіміз күндіз-түні, үнемі жанып тұрады. Егер де улы газ шығатын болса, біз енді хабарын тезірек білетін боламыз.

Төтенше жағдайлар қызметі қолға алған өртке қарсы күрес шаралары облысты толық қамтиды. Жылу беру маусымы басталған бір ай ішінде олар 40 мыңнан астам үйді аралап, 50 мыңдай адамға өрт қауіпсіздігін сақтау ережелерін түсіндірген.

Авторлары: Қарлығаш Қасиетова, Дәулет Қошқарбаев, Марат Игіліков