Қауіпсіздік рейтингі: Қазақстан әлемде нешінші орынға ие болды

Қазақстан World Justice Project (WJP) ұйымының 2026 жылғы қоғамдық қауіпсіздік бойынша әлемдік рейтингінде 41-орынға ие болды. Еліміз былтырмен салыстырғанда бір саты жоғарылады. Қазақстан заң үстемдігі бойынша жалпы рейтингте 67-орында тұр, деп хабарлайды Tengrinews.kz.

Қазақстанның қауіпсіздік деңгейі қалай бағаланды?

Order and Security ("Қоғамдық тәртіп және қауіпсіздік") көрсеткіші елде азаматтардың қауіпсіздігі мен мүлкі қаншалық қорғалатынын бағалайды.

Рейтингті жасау кезінде негізгі үш өлшем ескеріледі: қылмыс деңгейі; терроризм, қарулы қақтығыстар мен жаппай тәртіпсіздіктерді қосқанда, саяси зорлық-зомбылық қаупі; сондай-ақ, жеке дауларды күш қолдану арқылы шешу қаншалық жиі кездесетіні.

Бұл көрсеткіш бойынша Қазақстан 2026 жылы 143 ел мен юрисдикцияның ішінде 41-орынды иеленді.

worldjusticeproject.org сайтынан алынған скриншот

Төрт жыл ішінде еліміз өз орнын үш тармаққа жақсартты. Мәселен, 2023 жылы Қазақстан 44-орында болса, 2024 жылы 43-орынға, ал 2025 жылы 42-орынға тұрақтады.

Қазір бұл көрсеткіш бойынша Қазақстан бірқатар еуропалық және басқа да мемлекеттерді, соның ішінде Франция, Италия, Португалия, Грузия, Түркия, Ресей және Қырғызстанды басып озды.

ІІМ мәліметінше, 2026 жылғы тоғыз айда Қазақстандағы қылмыс деңгейі 15 пайызға азайған. Бұл былтырмен салыстырғанда 11 мыңнан аса қылмысқа аз.

Қылмыстың ең қауіпті түрлері, қоғамдық орындар мен көшелердегі құқықбұзушылықтар, отбасылық-тұрмыстық саладағы, кәмелетке толмағандар арасындағы және бұрын сотты болған адамдар жасаған қылмыстар бойынша көрсеткіш төмендегені байқалады.

Қоғамдық қауіпсіздіктен бөлек, World Justice Project тағы жеті бағытты бағалайды: мемлекеттік билік өкілеттігін шектеу, сыбайлас жемқорлық жоқтығы, Үкіметтің ашықтығы, негізгі құқықты қорғау, нормативтік талаптар сақталуы, азаматтық және қылмыстық сот төрелігі.

2026 жылғы заң үстемдігінің жалпы рейтингінде Қазақстан 143 елдің ішінде 67-орынды иеленді. Заң үстемдігінің жалпы рейтингінде Дания көш бастады. Екінші орынға Норвегия, үшінші орынға Финляндия, төртінші орынға Швеция, ал бесінші орынға Люксембург жайғасты.

Тағы оқыңыз: Қазақстан әлемдегі ірі экономикалар рейтингінде көтерілді

Бізді Google-дың негізгі дереккөздер тізіміне қосыңыз