Алатауда инвестициялық сот құрылады Тоқаев

Қазақстан Президенті Қасым-Жомарт Тоқаев Алатау қаласында жеке сот жүйесін құру қажеттігін мәлімдеді. Онда ағылшын жалпы құқық моделіне негізделген инвестициялық сот пайда болуы тиіс. Бұл туралы Мемлекет басшысы "Жаңа тарихи кезеңдегі Қазақстанның өзекті міндеттері" атты Қазақстан халқына Жолдауында айтты, деп хабарлайды Tengrinews.kz тілшісі.

Алатауда инвестициялық сот құрылады

Мемлекет басшысының айтуынша, тиімді сот төрелігі – кез келген халықаралық юрисдикцияның ұзақ мерзімді тартымдылығының басты шарты.

"Инвестициялар мен кәсіпкерлік үшін қолайлы ортаға айналуы тиіс Алатау жедел даму қаласын салудың маңызы көпшілікке айқын болды деп санаймын. Кез келген халықаралық юрисдикцияның ұзақ мерзімді тартымдылығының басты шарты – тиімді сот төрелігі. Сондықтан Алатауда сот төрелігінің жоғары сапасын қамтамасыз ететін сот жүйесін құру қажет", – деді Президент.

Ағылшын жалпы құқық моделі бойынша инвестициялық сот коммерциялық істерді қарайтын болады. Арнайы құқықтық режимге қатысты қалған мәселелердің барлығы Азаматтық соттың құзыретіне кіреді.

"Үкімет 2027 жылдың қаңтар айының соңына дейін Құрылтайдың қарауына "Алатау қаласының арнайы құқықтық режимі туралы" Конституциялық заңға тиісті түзетулер енгізуі тиіс. Барлық беделді және адал кәсіпкерлердің инвестициялық мүдделері ең күшті, сенімді құқықтық қорғаумен – Конституциямен кепілдендірілгенін еске салғым келеді", – деп атап өтті Қасым-Жомарт Тоқаев.

Алатау қаласы Қазақстанда 2024 жылы Жетіген ауылының негізінде пайда болды. Үкімет оның бас жоспарын бекітті. Сонымен қатар Іле және Талғар аудандарының, сондай-ақ Қонаев қаласының шекаралары өзгертіліп, аумақтардың бір бөлігі жаңа қаланың құрамына енді.

Алатау инвестиция тарту нүктесіне және іскерлік белсенділік пен инновациялардың жаңа орталығына айналуы тиіс. Ірі халықаралық компаниялармен көпмиллиардтық келісімдер жасалды. Олардың бірі Шэньчжэнь технополисін дамытуға қатысқан, енді Alatau City жобасымен жұмыс істейтін болады.

Өткен жылдың қыркүйегінде Алатау ерекше мәртебеге ие болды. Президент қаланың ерекше мәртебесі оның елге тиесілілігін өзгертпейтінін, тек дамудың жекелеген шарттарына ғана қатысты екенін түсіндірді.

Алатау жеке экожүйе ретінде – өз ережелерімен, басқаруымен және экономикасымен дамитын болады. Толығырақ – материалда.

Бізді Google-дың негізгі дереккөздер тізіміне қосыңыз