1 қарашадан бастап Қазақстанға келудің жаңа ережелері шетелдіктер не білуі керек

2026 жылғы 1 қарашадан бастап Ақтау әуежайы мен бірнеше автомобиль өткізу пунктінде Қазақстанға визасыз келетін шетелдік азаматтардан электрондық кіру рұқсатының бар-жоғы тексеріле бастайды, деп хабарлайды Tengri Travel.

Жаңа талап QazETA мемлекеттік цифрлық платформасын кезең-кезеңімен іске қосу аясында енгізіледі. Алғашқы кезеңде рұқсаттың болмауы елге кіруден бас тартуға себеп болмайды, алайда шетелдіктерге құжатты қалай рәсімдеу керек екені түсіндіріледі. 2027 жылғы 1 шілдеден бастап бұл талап қолданылатын тұлғаларда рұқсаттың болуы міндетті болады.

Өзгерістер Қазақстан Үкіметінің 2026 жылғы 10 қазандағы №890 қаулысында көзделген. Құжат шетелдіктердің Қазақстанға кіруі мен елде болу қағидаларын, сондай-ақ көші-қон бақылауын жүзеге асыру тәртібін жаңартады.

ETA қайда және қашан тексеріледі?

Электрондық кіру рұқсаты немесе ETA (Electronic Travel Authorization) QazETA арқылы құжат рәсімдеу құқығы берілген визасыз режимі бар елдердің азаматтарына арналған.

Жүйе кезең-кезеңімен енгізіледі:

2026 жылғы 1 қарашадан бастап - Ақтау халықаралық әуежайында, сондай-ақ Павлодар облысындағы "Үрлітөбе", Жамбыл облысындағы "Ауқатты", Түркістан облысындағы "Атамекен" және Жетісу облысындағы "Нұрлы жол" автомобиль өткізу пункттерінде. 2027 жылғы 1 қаңтардан бастап - Астана мен Алматы әуежайларында. 2027 жылғы 1 наурыздан бастап - мемлекеттік шекарадағы қалған өткізу пункттерінде. 2027 жылғы 1 шілдеден бастап - ETA шетелдік азаматтардың тиісті санаттарына міндетті болады. Рұқсаты жоқ адамдар елге кіргізілмейді.

1 шілдеге дейін ETA-ның болмауы бас тартуға негіз болмайды: бастапқы кезеңде саяхатшыларға құжатты рәсімдеу тәртібі түсіндіріледі.

Электрондық рұқсатты қалай рәсімдеуге болады?

Өтінімді App Store және Google Play дүкендерінде қолжетімді QazETA мобильді қосымшасы арқылы беруге болады. Рәсімдеу тегін, ал рұқсаттың қолданылу мерзімі 180 күнтізбелік күн.

ETA алу үшін қосымшаға тіркеліп, сәйкестендіруден өту және өтінімді толтыру қажет. Бұл жоспарланған сапарға дейін кемінде 72 сағат бұрын жасалуы тиіс.

Шекарада рұқсат рәсімдеу кезінде пайдаланылған паспорт деректерін көрсету қажет.

Бұл ретте ETA Қазақстанға кіруге кепілдік бермейді: түпкілікті шешімді шекаралық бақылау кезінде уәкілетті мемлекеттік орган қабылдайды. Рұқсат елде болу ұзақтығын айқындамайды - бұл қолданыстағы көші-қон заңнамасымен реттеледі.

Кімге ETA қажет емес?

Ережелерде растаушы құжаттары болған жағдайда электрондық рұқсатты рәсімдеуден босатылған тұлғалардың 29 санаты қарастырылған.

Атап айтқанда, ETA келесі тұлғаларға қажет емес:

16 жасқа толмаған балаларға және 65 жастағы және одан асқан адамдарға; Қазақстанның қолданыстағы визасы бар адамдарға; елде уақытша тұруға рұқсаты немесе тұруға ықтиярхаты бар шетелдіктерге; халықаралық әуежайдың транзиттік аймағында болатын және мемлекеттік шекарадан өтпейтін транзиттік жолаушыларға.

Сондай-ақ ерекшеліктер дипломаттардың белгілі бір санаттарына, ресми делегация мүшелеріне, халықаралық ұйымдардың қызметкерлеріне, әуе және теңіз кемелерінің экипаждарына, пойыз бригадаларына, босқындар мен пана іздеген адамдарға, сонымен қатар ережелерде көрсетілген басқа да кейбір тұлғаларға қолданылады.

Сапар алдында саяхатшының босатылған санаттардың біріне жататынын және бұл құқықты қандай құжаттар растайтынын тексеріп алған жөн.

QazETA деген не?

QazETA - "бір терезе" қағидаты бойынша құрылған мемлекеттік цифрлық платформа. Ол шетелдіктердің қажетті құжаттарды алуы және мемлекеттік сервистерді цифрлық форматта пайдалануы үшін көші-қон және ілеспе қызметтерді біріктіреді.

Қазір платформа пилоттық режимде жұмыс істеп тұр. ETA-дан бөлек, ол арқылы келесі қызметтер қолжетімді:

Электрондық виза (e-Visa). 104 елдің азаматтары көзделген санаттар бойынша, соның ішінде туризм, іскерлік сапар, емделу және жеке сапарға бір мәртелік электрондық виза рәсімдей алады. Ол үшін Қазақстан ІІМ-нің аумақтық полиция органдарында рәсімделетін электрондық шақыру қажет. Виза көрсетілген алушыға ғана жарамды және еріп жүруші тұлғаларға қолданылмайды. Ол бойынша келу және кету Қазақстанның халықаралық әуежайлары арқылы жүзеге асырылады. Электрондық резидент (e-Residency). Сервис Қазақстаннан тыс жерде жүрген шетелдіктер мен азаматтығы жоқ адамдарға арналған және "Астана" халықаралық қаржы орталығының юрисдикциясы аясында жұмыс істейді. Ол ЖСН-ды қашықтан алуды, банктік шоттар мен төлем карталарын ашуды, eSIM рәсімдеуді, сондай-ақ компанияларды қашықтан тіркеуді қарастырады. Мемлекеттік шекарадан өту туралы анықтама. Электрондық құжатты, атап айтқанда, мобильді құрылғылардың IMEI кодтарын верификациялау кезінде деректерді растау үшін алуға болады.

Болашақта QazETA функционалын кеңейту жоспарланған. Қарастырылған бағыттардың ішінде - медициналық сақтандыруды рәсімдеу, ETA иелері үшін шекаралық бақылаудан жеделдетіп өту және басқа да цифрлық сервистер бар.

Сапар алдында нені тексеру керек?

Шетелдіктерге Қазақстанға келу талаптарымен алдын ала танысып, оларға электрондық рұқсат қажет пе, жоқ па, соны анықтау ұсынылады. Шарттар азаматтығына және адамның елге келуіне негіз болатын құжаттарға байланысты болады.

Нақты бір азаматтық үшін ETA-ның қолжетімділігі туралы өзекті ақпаратты QazETA қосымшасынан тексеруге болады. Егер рәсімдеу кезінде техникалық ақау немесе сұрақтар туындаса, [email protected] мекенжайы бойынша қолдау қызметіне хабарласуға болады.

Тағы оқыңыз: Қазақстан СІМ Ресейдің жаңа кіру ережелеріне қатысты өтінішіне жауап берді

Бізді Google-дың негізгі дереккөздер тізіміне қосыңыз

Қосу