“Қам жеме, бәрі жоспар бойынша жүріп жатыр“: америкалық әйелдің ата анасы оның өліміне ChatGPT ді айыптады

Эпилепсиямен ауырған Amazon компаниясының 31 жастағы бағдарламашысы Боуэн Ванның ата-анасы қыздары қайтыс болғаннан кейін OpenAI компаниясын сотқа берді, деп хабарлайды Tengri Life Techcrunch.com баслымына сілтеме жасап.

Талап арызда ChatGPT-дің науқас әйелге құрысуға қарсы препараттардың дозасын біртіндеп азайтуға және мұны емдеуші дәрігерлерден жасыруға көмектескені айтылған. Techcrunch.com басылымы The New York Times-қа сілтеме жасап, әйел ақпанда қайтыс болғанын хабарлады.

Қайтыс болған әйелдің ата-анасының айтуынша, чат-бот құрысуға қарсы препараттан біртіндеп бас тарту кестесін жасап, бойында алаңдатарлық белгілер пайда болған кезде пациентті тыныштандырып отырған. Хат алмасуды талдау мәліметтеріне сәйкес, ол дозаны азайтуға байланысты кем дегенде 158 рет алаңдаушылық білдірген, бірақ оған алаңдауға негіз жоқ деген жауаптар берілген.

Боуэн Ван 2026 жылдың ақпанында көз жұмды. Оның ата-анасы OpenAI мен компания басшысын чат-боттың қауіпті медициналық кеңестері қыздарының өліміне әкеп соқтырған болуы мүмкін деп айыптап отыр. Талап арыз сотқа жолданды, айыптау әзірге дәлелденген жоқ.

ChatGPT кеңесіне сенген америкалық өліп қала жаздады

Бұған дейін АҚШ-тың Флорида штатының тұрғыны Скотт Уинтерс OpenAI мен компанияның бас директоры Сэм Альтманға қарсы талап арыз түсірген болатын. Ер адам ChatGPT-дің денсаулыққа қатысты кеңестері оны дәрігерлерге дер кезінде қаралудан бас тартуға мәжбүр еткенін атап өтті. Кейін ол өкпе артериясының ауыр тромбоэмболиясына шалдығып, ажал аузынан қалған.

Талапкер ChatGPT жалпы ақпарат беру шеңберінен шығып, лицензиясыз медициналық практикамен айналысты деп мәлімдеді. Сондай-ақ талап арызда OpenAI қоғамдық қауіпсіздік мәселелеріне қарағанда, пайдаланушыларды тарту мен коммерциялық мүддеге көбірек көңіл бөлгені, ал қолданыстағы қорғаныс механизмдерінің қауіпті болуы мүмкін кеңестердің орындалуына тосқауыл қоюға жеткіліксіз болғаны айтылған. Бұл оқиғаның мән-жайын мына жерден оқыңыз.

Бізді Google-дың негізгі дереккөздер тізіміне қосыңыз