Атырауда референдумды бақылау үшін 16 қоғамдық ұйым аккредиттелді

Жалпы өңірде байқау жұмыстарын жүргізуге 17 қоғамдық ұйым өтінім берген. Соның 16-сы аккредиттелсе, тағы бір ұйымның құжаты қаралып жатыр. Қолданыстағы тәртіпке сәйкес, аккредиттелген қоғамдық бірлестіктер мен коммерциялық емес ұйымдардан бір учаскеге бір мезетте бір ғана байқаушы кіре алады. Байқаушы өзімен бірге жеке басын және өкілеттігін куәландыратын құжаттардың түпнұсқасын көрсетуі тиіс. Сондай-ақ, ол учаскелік референдум комиссиясының жұмысына және дауыс беруге келген азаматтарға кедергі келтірмеуі қажет.

— Халықаралық деңгейде жұмыс істейтін байқаушыларға келсек, қазіргі таңда Орталық референдум комиссиясы арқылы аккредиттеу жұмысы толық аяқталды. 38 шет мемлекеттен және 11 халықаралық ұйымнан барлығы 359 байқаушы аккредиттеуден өтті. Әзірге Атырау облысында жұмыс жасап жатқан халықаралық байқаушылар жоқ. Келген жағдайда оларға қажетті жағдай жасалады, — деді Атырау облыстық аумақтық референдум комиссиясының төрағасы Әсия Қыстаубаева

Байқаушы ретінде тіркелген қоғамдық ұйымдардың өкілдері референдум барысында заң бұзушылыққа куә болған жағдайда фото және бейнетүсірілім жүргізуге құқылы. Жиналған дәлелдерді пайдаланып, референдум комиссиясына немесе сотқа шағым түсіре алады.

Атырау облысында референдумды өткізу үшін 276 учаскелік референдум комиссиясы жұмыс істейді. Барлық комиссия қызметі Орталық референдум комиссиясы бекіткен күнтізбелік жоспарға сәйкес жүргізіліп жатыр. Учаскелік референдум комиссиялары 22 ақпаннан бастап өз жұмысына кірісті. Ал 27 ақпаннан бастап дауыс беруге құқығы бар азаматтар өздерінің деректерін учаскелерге барып тексеруге мүмкіндік алды. Қазіргі уақытта Атырау облысы бойынша дауыс беруге құқығы бар азамат саны 416 мыңнан асады.

15 наурыз референдум күні азамат түрлі себеппен тіркелген мекенжайынан тыс жерде болатын болса, алдын ала есептен шығару куәлігін алуға құқылы. 27 ақпанда басталған бұл жұмыс 14 наурыз сағат 18:00–ге дейін жалғасады. Өз учаскеңізге барып, учаскелік комиссияға жазбаша өтініш жазып, жеке басыңызды куәландыратын құжатты ұсынуыңыз қажет. Құжатты сенімхат негізінде жақындарыңыз арқылы да алуға болады. Ол үшін нотариаттық куәландыру талап етілмейді, яғни қағазға қолмен жазып берсеңіз жеткілікті.

— Бір елдімекен шегіндегі басқа учаскеде дауыс бергісі келетін азаматтарға есептен шығару куәлігі берілмейді. Дауыс беруге құқығы бар азаматтар өз учаскелері туралы мәліметті Телеграмда ашылған «AtyrauReferendumBot» аккаунты, сондай-ақ облыс әкімдігінің atyrau.gov.kz. ресми сайтының «Сайлау» парақшасындағы «РЕФЕРЕНДУМ — 2026» бөліміндегі «Өзіңді дауыс беруші азаматтар тізімінен тексер!» сілтемесіне өтіп, ЖСН-ді теріп сұрау салуға мүмкіндік бар, — деп мәлімдеді Атырау облыстық аумақтық референдум комиссиясы.

Сонымен қатар 109 біріңғай байланыс орталығына хабарласуға болады. 22 ақпаннан бастап өңірде 276 учаскелік референдум комиссиясы жұмыс істеп тұр. Ал облыста 416 мыңнан астам азамат дауыс беру құқығына ие.

Атырауда референдум және әз-Наурыз күні қоғамдық көліктер жолаушыларды тегін тасымалдайды.