Атырауда жол саласы қызметкерлерінің кәсіби мерекесі атап өтілді

Атырауда Автожол қызметкерлері күні мерекесіне орай салтанатты шара өтті. Іс-шарада облыс әкімінің орынбасары Қайрат Нұртаев сала ардагерлері мен мамандарын кәсіби мерекемен құттықтап, түрлі марапаттар табыстады, деп хабарлайды Өңірлік коммуникациялар қызметі.

Марапатталғандар арасында:

«Еңбек ардагері» медалімен – 4 адам,

«Құрметті жолшы» төсбелгісімен – 5 адам,

«Құрметті жүргізуші» төсбелгісімен – 4 адам,

«Үздік автокөлікші» төсбелгісімен – 3 адам марапатталды.

Сондай-ақ ҚР Көлік министрінің «Құрмет грамотасы» мен «Алғыс хаттары», Атырау облысы әкімінің және облыстық мәслихат төрағасының алғыс хаттары 50-ден астам сала маманына табысталды.

Облыс әкімінің орынбасары Қайрат Нұртаев өз сөзінде жол саласында атқарылып жатқан жұмыстарға тоқталды:

– Бірлескен еңбектеріңіздің арқасында өңірде ірі жобалар жүзеге асуда. Атырау–Астрахань шекарасындағы өткізу бекетінде жүк көліктерінің кезегін азайту үшін жолақтар саны сегізге дейін ұлғайтылады. Сондай-ақ Атырау–Доссор бағытын бірінші санатқа өткізу үшін қаржыландыру жұмыстары жүргізіліп жатыр. Баршаңызға адал еңбектеріңіз үшін алғыс білдіремін. Жолдарыңыз әрдайым ашық болсын, – деді ол.

Қазір Атырау облысындағы автомобиль жолдарының жалпы ұзындығы шамамен 6,5 мың шақырымды құрайды. Биыл өңірдің 45 елді мекенінде 78 жоба жүзеге асырылып жатыр. Нәтижесінде 230 шақырымнан астам жол жөнделіп, жақсы және қанағаттанарлық жағдайдағы жолдардың үлесі 82 пайызға дейін жетуі көзделген.

Жолаушылар тасымалы саласында да айтарлықтай ілгерілеу бар. Бүгінде облыс аумағында 95 бағыт бойынша 12 мекеме қызмет көрсетіп, қала мен аудан арасындағы қатынас тұрақты жолға қойылған.

Биыл жаңа автопарк ашылып, 90 заманауи автобус сатып алынды, оның 48-і қазан айында жолға шықты. Сонымен қатар өңірде «Ашық аспан» режимі енгізіліп, халықаралық әуежай мен 9 теміржол вокзалы жаңғыртылуда. Бұл жұмыстар жыл соңына дейін толық аяқталмақ.

Бүгін, 17:33