Зайсанда Абайдың шөбересінің 100 жылдығы атап өтілді

Зайсан қаласында Мұхтар Әуезов атындағы орта мектепте Абайдың 180 жылдығына орай «Абай тағылымы және ұрпақтар сабақтастығы» тақырыбында ғылыми конференция өтті. Конференция тақырыбына Абай атамыздың 180 жылдық мерейтойы және Абайдың шөбересі, педагог-ақын, Қазақ ССР халық ағарту ісінің озық қызметкері Гүлзифа Исрайлқызының 100 жылдығы арқау болды, деп жазады Egemen.kz.

Ашылу салтанатында құттықтау сөз алған Зайсан Білім бөлімінің басшысы Меруерт Мұратқызы конференция қонақтарын құттықтап, Абайдың 180 жылдығы аясындағы игі шаралардың маңызын атап өтті. «Шәкіртсіз ұстаз – тұл» деген Абай сөзіне тоқталған спикер, Гүлзифа Исрайлқызының шәкірттері осы мектепте арнайы кабинет ашуға ұйытқы болғанын жеткізді. Ол конференцияның мұғалімдер үшін пайдалы ғылыми алаңға айналарына сенім білдірді.

Осындай тілектестікті Зайсан ауданы әкімінің орынбасары Нұрғайни Нұрлыбекқызы да айтып, аудан көлемінде өтіп жатқан Абай жылына арналған шараның тарихи маңызын атап өтті. Келесі сөз алған Күлзада Базылбекқызы «Атамұра» корпорациясының президенті Құл-Мұхаммед Рақымғали Абрарұлының қолдауымен Гүлзифа Исрайлқызына арналған сыныпқа Абай шығармаларынан 100 кітап тарту етілгенін жеткізді. Сонымен бірге баспа президентінің Абайдың 180 жылдығына орай Қазақстан мектептеріне 1000 кітап таратқанын атап өтті.

Салтанатты рәсімді М. Әуезов мектебінің басшысы Бақытгүл Қизатқызы қорытындылап, мектеп ұжымының конференцияны ұйымдастыруға белсенді атсалысқанын айтты. Ұйымдастырушыларға алғыс білдіріп, конференцияның ашық екенін жариялады.

Конференция екі бөлімнен тұрды. Бірінші бөлім – Ұлы Абайдың 180 жылдығына арналды. «Атамұра» баспасының авторы, Л.Н. Гумилев атындағы ЕҰУ-дің Абай академиясының бас ғылыми қызметкері, ф.ғ.к Айман Советқызы Ақтанова «Абай шығармаларындағы ұлттық құндылықтарды таныту жолдары» атты дәріс оқыды. Ол сабақ мақсаттарын құру, әдебиетті оқыту тәсілдері жөнінде маңызды әдістемелік ойларымен бөлісті. Екінші докладты Абай атындағы ҚазҰПУ-дің доценті, п.ғ.к. Бидана Қабатай «Орта мектепте Абай шығармаларын оқыту мәселелері» тақырыбында жүргізді. Үшінші сөзді Гүлзифа Исрайлқызының шәкірті, тарихшы Әділбек Артықбаев алып, «Сегіз аяқ» әнінің шығу тарихын баяндап, әнді домбырада орындап берді. Сондай-ақ Ақжол Қадылбекұлы «Абайтанушы ғалымдардың еңбектерінің маңызы» жайында мазмұнды дәріс оқыды.

Екінші бөлім Гүлзифа Исрайлқызының өмір жолына арналды. Алғашқы сөзді шәкірті Күлзада Базылбекқызы «Ұлы Абайдың ұрпақтары» атты бейнешолумен бастап, ұстазының әдебиет пәнін оқытудағы әдістемелік еңбектерін таныстырды. Зухра Дауытова «Асылдың сынығы – Гүлзифа Исрайлқызының өнегелі өмірі» тақырыбында ұстаз өміріне шолу жасады.

Келесі маңызды сәт – Гүлзифа Исрайлқызының кабинетін ашу рәсімі болды. Лентаны Айман Ақтанова мен аудан тіл бөлімінің басшысы Райса Шотаева қиып, шашуды қызы Роза апай шашты. Кәбинетке кірген сәтте интерактивті тақтадан ақын Серік Құсанбаевтың «Ұшқан ұям» өлеңі оқылып тұрды. Бұл көрініс ұстаз шәкірттері мен қонақтарға ерекше әсер қалдырды.

Гүлзифа Исрайылқызы – саналы ғұмырын ұстаздыққа арнаған тұлға. Ол Сарыжал мектебін бітірген соң, еңбек жолын сол мектепте бастаған. Соғыс жылдары ауылшаруашылық жұмысына араласып, майданға қажет өнімдер дайындауға үлес қосқан. 1945 жылы Абай мектебіне ауысып, қазақ тілі мен әдебиетінен сабақ берді. «Абай ұрпақтары» журналын шығаруға басшылық етті. 1965 жылы Н. Крупская атындағы пединститутты тәмамдады. 2003 жылы облыс әкімінің «Құрмет грамотасымен» марапатталып, «Зайсан ауданының Құрметті азаматы» атанды.

Гүлзифа Исрайлқызы – ақын. Өлең жазуды 14 жасында бастаған. Шығармалары «Достық», «Коммунизм туы» газеттерінде жарияланған. 2010 жылы Зайсан әкімдігінің қолдауымен өлеңдері мен өмірбаяны «Талант» баспасынан кітап болып шықты. «Ұрпақ сөзі», «Ескерткіші атамның», «Ұлылық мәңгі өлмейді», «Мұхтар ағаға» атты 50-ден аса өлеңі жинаққа енген.

Гүлзифа Исрайлқызының өнегелі еңбегін жалғастырып жүрген шәкірттері бүгінде түрлі салада елге танымал мамандар атанды. Арасында ақын, ғалым, ұстаз, кәсіпкер, басшылық қызметкерлер бар: Серік Құсанбаев, Зухра Дауытова, Күлзада Искакова, Төлеубек Искаков, Тұрсынбек Мұсаханов, Әділбек Артықбаев, Нұрлыбек Кегенов, Гүлсара Тлеубердина және басқалар.

Осындай табиғаты да, тұлғалары да бай Зайсан өңірінде Гүлзифа Исрайлқызы секілді біртуар ұстаздың еңбегі – өсіп келе жатқан ұрпақ үшін тағылым мен өнегенің өшпес мектебі.

Гүлжанат Қоқанова,
Ы. Алтынсарин төсбелгісінің иегері