Атыраудағы NIS мұғалімінің оқушымен хат алмасуы: тексеру басталды

Атырауда Назарбаев Зияткерлік мектебі Threads әлеуметтік желісіндегі жазбадан кейін тексеру жұмыстарын бастады. Жазба авторы бастапқы әскери дайындық мұғалімінің өзінің кәмелетке толмаған сіңлісімен жазысқан хаттары туралы айтқан.

ddaiuriss нигімен шыққан жазба авторының айтуынша, 34 жастағы мұғалім 17 жастағы бойжеткеннің телефон нөмірін оның сыныптасынан алып, кейін оқушыға хат жазып, жағдайын сұрап және кездесуді ұсына бастаған.

Бұл хаттар туралы бойжеткеннің достары біліп қойған соң, олардың бірі мұғалімге телефон соғып, ересек ер адамның кәмелетке толмаған оқушымен мұндай қарым-қатынасқа неліктен жол беріп отырғанын сұраған. Жазба авторының мәлімдеуінше, мұғалім жауап ретінде жай ғана әзілдегенін және жалпы бәрімен осылай араласатынын айтқан.

Кейін мұғалім бойжеткенге қайтадан хат жазып, оны өзінің ниетін бұрыс түсінді деп сендіруге тырысқан.

Жазба авторының сөзінше, мектеп әкімшілігімен сөйлескеннен кейін де мұғалім өзінің бұл әрекетін әзіл деп түсіндірген.

Оқушының ата-анасы білім беру мекемесінің басшылығына арызданып үлгерді және болған оқиғаға ресми түрде тексеру жүргізіліп, құқықтық баға берілуін талап етпек.

«Мұғалім лауазымы — бұл оқушылардың жеке шекарасын бұзу құқығы емес, үлкен жауапкершілік», — деп жазды автор мектеп оқушыларының қауіпсіздігі үшін бұл жағдайды көпшілікке жария етуді ұйғарғанын түсіндіріп.

«АЖ» редакциясы осы жағдай туралы түсіндіріп беру үшін Атырау қаласындағы Назарбаев Зияткерлік мектебіне хабарласты.

«Қазір әлеуметтік желіде мектеп мұғаліміне қатысты жарияланған ақпарат бойынша қазіргі уақытта тексеру жүргізіліп жатыр. Оқушыларды қорғау жөніндегі қолданыстағы саясатқа сәйкес, Мектеп қауіпсіздігі қызметі жарияланымда көрсетілген мән-жайларды зерделеуге кірісті. Аталған жағдай «Назарбаев Зияткерлік мектептері» ДББҰ басшылығының бақылауында», — деп хабарлады баспасөз қызметінен.

Мектеп өкілдері тексеру қорытындысы бойынша Қазақстан Республикасының заңнамасы мен ұйымның ішкі нормативтік құжаттарына сәйкес тиісті шаралар қабылданатынын хабарлады. 

Айнұр САПАРОВА

23 қазан, 15:50