Атыраулық компания Парыз сыйлығын алды

Атыраудағы «Dalaro/Overseas/Limited» ЖШС «Парыз» сыйлығына ие болды.

100 пайыз қазақстандық компания саналатын кәсіпорын 27 жылдан бері Теңіз кеніші мен өзге де өндірістік нысандарда электрмонтаждау және іске қосу жұмыстарымен айналысады. Компания қазір Атырауда аккумулятор батареяларын қуаттауға арналған құрылғы мен электромобильдерді қуаттайтын құрылғы шығаруды қолға алған.

Компаниядағы техникалық қауіпсіздік пен еңбек қорғау мәселесіне баса мән берілген. Серіктестік тарихында бұрын-соңды оқыс оқиға не жарақат алу деректері тіркелмеген. Осындай көрсеткіштің арқасында «Даларо/Оверсиз/Лимитед» компаниясы үздік деп танылып, «Парыз» сыйлығын иеленді.

1998 жылы құрылған кәсіпорында қазір 1000-ға тарта адам жұмыс істейді. Әр жаңа қызметкер алдымен білікті мамандардан тәжірибе жинақтайды. Кейін өндіріс алаңына жіберіледі. Өйткені компанияда асқан қырағылық пен техникалық қауіпсіздік қатаң бақыланады.

Гүлмира Донбаева, «Dalaro/Overseas/Limited» ЖШС Мемлекеттік және өзге де органдармен байланыс бойынша менеджер:

- Компанияның негізгі қызметі Теңіз кенішінде жүргізіледі. Енді қызметкерлердің арасында осы техникалық қауіпсіздікті, еңбек қауіпсіздігін  қатаң сақталынады. Оқыс оқиғалар, жарақат алу мәселелері тіркелген емес.

Компания өңір тұрғындарын жұмыспен қамтуға да ерекше назар аударып отыр. Сондай-ақ білікті инженерлік-техникалық мамандарды даярлау мақсатында жоғары оқу орындарымен бірлесе жұмыс істеуде.

Олег Басиев, «Dalaro/Overseas/Limited» ЖШС Бас директордың бірінші орынбасары:

- Біз қазір Мұнай және газ университетімен бірлесіп жұмыс істейміз. Болашақ мамандардың тәжірибесін шыңдап, олардың теориялық қана емес, практикалық дағдысын жетілдіруге күш саламыз. Біз студенттермен қоса, оқытушыларды да оқытамыз.  Теория ғана емес, іс жүзінде жұмыстың бағытын білуі маңызды.

Қазір компанияда инновациялық даму бөлімі жұмыс істейді. Кәсіпорынның білікті мамандары облыс орталығында аккумулятор батареяларын қуаттауға арналған құрылғы мен электромобильдерді қуаттайтын құрылғы шығарып жатыр. Бұл елдегі теңдессіз жоба.

Авторлары: Асланбек Шығыр, Амантай Матенов