Ауыр жүк көліктеріне бақылау күшейді

АСТАНА, 23 шілде - Sputnik. Ауыр салмақты автокөлік құралдарына бақылау күшейеді, деп хабарлайды көлік министрлігі.

10 шілде мен 10 тамыз аралығында ірі габаритті және ауыр салмақты жүктерді тасымалдауға бақылау күшейді. Мақсат - автомобиль жолдарын сақтау.

"Жол төсемінің жоғары температура әсерінен бүлінбеу үшін жүк автокөліктерінің қозғалысына уақытша шектеу қоятын маусымдық температуралық режим қолданылады. Температуралық шектеулер ауа температурасы +25 °C-тан жоғары болған кезде енгізіледі және жүк көліктерінің жекелеген санаттарына қолданылады", - дейді министрлік.

Қандай көліктерге шектеу жоқ

Халықаралық және жолаушылар тасымалын жүзеге асыратын көлік құралдарына;

тез бұзылатын, қауіпті және гуманитарлық жүктерді тасымалдайтын көліктерге шектеу жоқ.

төтенше жағдайлардың салдарын жоюға, жол жұмыстарын жүргізуге және әскери тасымалдарға тартылған автокөліктерге шектеулер қолданылмайды.

302 жүк көлігіне шектеу қойылды

Бұл шара аясында 500-ден астам ауыр салмақты автокөлік құралы тексерілді.

"Нәтижесінде көлік заңнамасының 281 бұзушылығы, оның ішінде 116 артық жүк тиеу дерегі анықталды. Сонымен қатар маусымдық температуралық режим талаптарын сақтамауына байланысты 302 жүк көлігінің қозғалысына шектеу қойылды", - дейді көлік министрлігі.