Аяқ киімді таңбалаудың жаңа ережелері

21 желтоқсаннан бастап аяқ киімді таңбалау мен қадағалаудың ережелері өзгереді. Енді тауарды таңбалау кезінде мәліметтердің қатарына «сәйкестік» сертифкаттарын енгізу қажет.

Сондай-ақ тиісті актілерде бағаға қатысты есеп беру түрін анықтап, қосылған құн салығын көрсету міндеттеледі. Салада тағы қандай өзгеріс бар? 

Бұл фабрикада 60 жылдан бері таза былғарыдан аяқ киім тигіледі. Мұндағы тауарлар нарыққа шықпас бұрын таңбаланады. Отандық өндірушілер аяқ киім қорабына DataMatrix идентификаторын енгізу –  көптеген мүмкіндікке жол ашады деп отыр.

Мұхтар Шаюнусов, Аяқ киім өндіру фабрикасы бас директорының орынбасары:

- Аяқ киімді өзіміз таңбалаймыз. Ол бізге үлкен мүмкіндік береді. Мәселен, тұрғындар тауарды сатып алып, қораптың сыртындағы штрих-код арқылы Тараздан шыққан өнім екенін көре алады. Аяқ киімнің қандай материалдан тігілгенін, табаны қалай өңделгені бойынша барлық ақпаратты алады. Бұл ең алдымен өндірушінің тұтынушы алдындағы жауапкершілігін көрсетеді.

Аяқ киімдерді міндетті таңбалау 2021-ші жылы енгізілген еді. Содан бері кәсіпкерлердің тауарларына Дата Матрикс кодын қолдану талабы қойылды. Бірақ енді аяқ киімді таңбалау мен қадағалау ережелері өзгереді. Дәлірек айтсақ, енді бұл тауар түрін таңбалау кезінде «сәйкестік» сертификаттары туралы мәліметтерді енгізу қажет. Екіншіден, импортталған аяқ киім кедендік рәсімдеуден өткен соң, оларды таңбалаған импорттаушының қойма мекенжайы туралы ақпаратты нақтылау керек. Үшіншіден, тиісті актілерде бағаға қатысты есеп беру түрін анықтап, қосылған құн салығын көрсету қажет.

1.    Аяқ киімді таңбалау кезінде «сәйкестік» сертификаттары туралы мәліметті енгізу

2.    Импортталған аяқ киім кедендік рәсімдеуден өткен соң, оларды таңбалаған импорттаушының қойма мекенжайы туралы ақпаратты нақтылау

3.    Тиісті актілерде бағаға қатысты есеп беру түрін анықтап, ҚҚС көрсету  

Ерлан Қарабаев, Тауарларды таңбалаудың бірыңғай операторы жеңіл өнеркәсіп тауарларын таңбалау жобасының басшысы:

- Бұйрық ресми түрде 11 желтоқсанда жарияланды. Демек 10 күннен кейін, яғни 21 желтоқсанда күшіне енеді. Сәйкесінше біз бірыңғай оператор ретінде осы қағидаларға сәйкес тауарларды таңбалаудың ақпараттық жүйесінің функционалына өзгерістерді енгіземіз. Негізі кедендік бақылауға дейін аяқ киім тауары таңбалануға тиіс және өзге елдерден таңбаланып келеді де. Ал таңбаланбаса, онда заңға сәйкес жүкті кедендік рәсімдеуден өткізе алмайды.

Өнеркәсіп және құрылыс министрлігінің мәліметінше, бүгінде аяқ киім айналымының 96 пайызы импорттық, 3 пайызы отандық өнім. Қазақстанда жасалған тауардың үлесі аз болып көрінгенімен, осы міндетті таңбалау енгізілгелі бері көлееңкелі айналыммен күрес күшейді. Сәйкесінше ішкі нарық қазір дамып жатыр. Былтыр еліміздегі аяқ киім өндірісі 124 мыңға жуықтаса, биылғы 10 айда 100 мыңнан асады.

Авторы: Альмира Оразбай